འདམ་གཞུང་རྟ་རྫི་དགོན་པ།
གཉན་ཆེན་ཐང་ལྷའི་ཆིབས་རྫི་གྱང་ལྷ་བཙན་པོའི་རི་མགུལ་ན་ཡོད་པའི་རྟ་རྫི་དར་ཡོལ་ཕུག་ནི། རྗེ་དུས་གསུམ་མཁྱེན་པ་སྤྱི་ལོ་1150 ཡས་མས་སུ་གནས་འདིར་སྒྲུབ་པ་མཛད་ནས་བྱིན་གྱིས་བརླབས། དེ་རྗེས་རྒྱལ་དབང་བྱང་ཆུབ་རྡོ་རྗེ། ཞྭ་དམར་དཔལ་ཆེན་ཆོས་ཀྱི་དོན་འགྲུབ། སི་ཏུ་པཎ་ཆེན་ཆོས་ཀྱི་འབྱུང་གནས། རྒྱལ་དབང་མཁའ་ ་རྡོ་རྗེ། སྒྲུབ་དཔོན་བདེ་ཆེན་ཚེ་དབང་སོགས་དམ་པའི་སྐྱེས་བུ་དུ་མས་སྒྲུབ་པ་མཛད།
རྟ་རྫི་ཆུ་ཚན་ནི། རྒྱལ་བ་བྱང་ཆུབ་རྡོ་རྗེ་སོགས་ཡབ་སྲས་ལྔ་དུས་གཅིག་ཏུ་གདན་འཛོམས་ནས་སྐུ་ཁྲུས་གནང་། རྒྱལ་དབང་རིག་པའི་རྡོ་རྗེ་གནས་འདིར་ཕེབས་སྐབས་ནམ་ཟླ་དགུན་ཁ་ལ་ཡང་སྦྲུལ་མང་པོས་གུས་པའི་ཚུལ་གྱིས་སྐུ་པང་དུ་འཛེགས་པ། མགུལ་དུ་འཁྱུད་པ་སོགས་གཞི་བདག་མགུ་བའི་མཚན་མ་བྱུང་། རྒྱལ་དབང་ཨོ་རྒྱན་འཕྲིན་ལས་གནས་འདིར་ཕེབས་ནས་ཁྲུས་དང་རབ་གནས་མཛད་དེ་བྱིན་གྱིས་བརླབས། བྲག་ངོས་སུ་རྟ་རྫིའི་རང་བྱོན་ཡང་མཇལ་རྒྱུ་ཡོད།
རྟ་རྫི་དགོན་པ་ནི། མཚུར་ཕུའི་བླ་མ་དགྲ་འདུལ་ལགས་ཀྱིས་འདུ་ཁང་ཀ་བ་དྲུག་དང་གཟིམ་ཆུང་གསོལ་ཐབ་སོགས་རྟེན་བརྟེན་པ་དང་བཅས་པ་གསར་བཞེངས་མཛད། གདན་ས་མཚུར་ཕུ་ནས་བླ་གྲྭ་ཆེད་གཏོང་མཛད་ནས་ཆོས་ཕྱོགས་ཀྱི་བྱ་བ་སྒྲུབ་བཞིན་མཆིས་སོ། །
དམ་ཆོས་གླིང་ནི། རྒྱལ་དབང་བྱང་ཆུབ་རྡོ་རྗེ། སི་ཏུ་པཎ་ཆེན། དཔལ་ཆེན་ཆོས་ཀྱི་དོན་འགྲུབ་སོགས་ཀྱིས་སྒྲུབ་པ་མཛད་མྱོང་།
ནམ་མཁའ་གསལ་དྭངས་ནི་རྒྱལ་བ་ཡབ་སྲས་རྣམ་པ་སྐྱོ་གསེང་དུ་ཕེབས་ས་མེ་ཏོག་སྣ་ཚོགས་བཀྲ་བའི་སྤངས་ལྗོངས་ཤིག་ཡིན།
