༈ བཀྲ་ཤིས་ལྷ་ཚལ་གཡང་འཁྱིལ་གླིང་ནི། མགར་ཆེན་ཕྲིན་ལས་ཡོངས་ཁྱབ་ཀྱི་ཐུགས་སྲས་མགར་གྲུབ་ཆེན་འཆི་མེད་རྡོ་རྗེ་དང་༧སྐྱབས་མགོན་སངས་རྒྱས་བསྟན་འཛིན་རྣམ་གཉིས་ཀྱིས་མདོ་ཁམས་གཞུང་དུ་ཆོས་འཁོར་བསྐོར་སྐབས་ཆོས་རྒྱལ་ཚངས་པ་ལྷ་ཡི་མེ་ཏོག་གི་སྐུ་ལྷ་མདོ་ཁམས་སྐུ་རྒྱལ་ཤེ་ནེས་མགར་གྲུབ་ཆེན་འཆི་མེད་རྡོ་རྗེ་ལ་ཟལ་མོ་སྒང་དུ་དགོན་པ་བཏབ་ན་བསྟན་འགྲོར་ཕན་པར་ལུང་བསྟན་པ་བཞིན་སྤྱི་ལོ་༡༩༢༥ལོར་གཙུག་ལག་ཁང་དང་ཕྱི་ནང་གི་བརྟེན་དང་རྟེན་པར་བཅས་པ་ལེགས་པར་བཞེངས། བཀྲ་ཤིས་ལྷ་ཚལ་གཡང་འཁྱིལ་གླིང་ཞེས་མཚན་གསོལ། བཙུན་མ་ལྔ་བརྒྱ་ཙམ་འདུས། སྒྲུབ་ཐེངས་རེར་བཙུན་མ་བརྒྱ་རེ་ཙམ་བཞུགས། སྒྲུབ་བརྒྱུད་ཀྱི་བསྟན་པ་རྒྱས་པར་གྱུར། རིག་གསར་གྱི་སྐབས་སུ་རྩ་བརླག་བྱས།སྤྱི་ལོ་༡༩༨༥ལོར་༧སྐྱབས་མགོན་སངས་རྒྱས་བསྟན་འཛིན་གྱིས་སླར་གསོ་གནང་བར་བཞེད་པ་དེ་སྤྱི་ལོ་༡༩༨༧ལོར་ད་ལྟའི་དགོན་གནས་འདིར་སླར་གསོ་གནང་། བཀྲ་ཤིས་ལྷ་ཚལ་གཡང་འཁྱིལ་གླིང་ཞེས་མཚན་གསོལ། མཚོ་རྒྱལ་དགོན་ནང་དུ་གདན་དྲངས། བླ་མ་རིན་པོ་ཆེའི་ཐུགས་ཁུར་གནང་སྟེ་ལོ་རེ་བཞིན་ཐུགས་སྒྲུབ་འཚོགས། སྒྲུབ་ཁང་དུ་འཇམ་མགོན་ཆོས་ཀྱི་སེངྒེས་ཤངས་པའི་ཆོས་སྐོར་ཉམས་བཞེས་དགོས་པའི་ཞལ་བཀོད་ལྟར་ཡང་ཁྲོད་ཙཱ་འདྲའི་ཕྱག་བཞེས་ལྟར་མཛད། སྤྱི་ལོ་༢༠༠༨ལོར་གཙུག་ལག་ཁང་རྒྱ་བསྐྱེད་བྱས། སྤྱི་ལོ་༢༠༡༤ལོར་སྒྲུབ་ཁང་རྒྱ་བསྐྱེད་དང་ལེགས་བཅོས་གནང་། ཕྱི་ནང་གི་བརྟེན་དང་རྟེན་པ་མ་ཚང་བ་མེད་པ་བཞུགས། སྔར་གྱི་དུས་མཆོད་རྣམས་མ་ཉམ་པའི་ཐོག་ནས་སྒྲུབ་བརྒྱུད་བསྟན་པའི་སྙིང་པོ་ཉམས་བཞེས་གནང་བའི་གནས་དམ་པར་གྲུབ་བོ། །
