༡གནས་མདོ་བཀའ་བརྒྱུད་རབ་འབྱོར་དགོན་ནི་གནས་མདོའི་ལུགས་ཀྱི་དགོན་སྡེ་ཆེ་ཤོས་ཤིག་སྟེ། ཁམས་སྟོད་ནང་ཆེན་ཟླ་རྒྱལ་གནས་རིའི་གཡས་ཕྱོགས་དང་རྫ་ཆུའི་འགྲམ་དུ་ཡོད།
སི་ཏུ་པདྨ་ཉིན་བྱེད་དབང་པོ། ཀརྨ་བདེ་ཆེན་སྙིང་པོ། འཛི་སྒར་རྡོ་གྲགས་རྣམ་པའི་བཀའ་ལུང་བཞིན་མེ་སྦྲུལ་སྤྱི་ལོ༡༧༩༧ ལོ་ལ་འཛི་སྒར་རྡོ་གྲགས་ཀྱིས་ས་འདུལ་མཛད་དེ་གནས་མདོ་ཀརྨ་བདེ་ཆེན་སྙིང་པོའི་སློབ་མ་གྲུབ་ཐོབ་རབ་འབྱོར་གྱིས་ཕྱག་བཏབ་ནས་རབ་འབྱོར་དགོན་ཞེས་བླ་མའི་མཚན་དགོན་པར་ཐོགས།
སི་ཏུ་རིན་པོ་ཆེའི་བཀའ་བཞིན་དུས་ངན་གཉན་ནད་བཅོས་ཐབས་སྨན་ཡིག་རལ་གྲི་ཚར་གཅོད་དང་རལ་གྲི་ཕྱུང་རྒྱག་མཛད། ༢ རབ་འབྱོར་སྐུ་ཕྲེང་གཉིས་པའི་སྐུ་ཚེའི་སྟོད་ནས་ལྷ་ཁང་ཆུང་བ་ཀ་བ་བརྒྱད་ཅན་གསར་བཞེངས་མཛད། མགོན་ཁང་ཡང་གསར་དུ་གྲོ་ལོད་ཁང་དང་མགོན་པོ་ཕྱག་བཞི་པའི་མགོན་ཁང་གཉིས་བཞེངས་པ་སོགས་ཀྱི་མཛད་རྗེས་མང་ངོ་། ། སྐུ་ཕྲེང་གསུམ་པས་ལྷ་ཁང་ཀ་བ་བཅུ་དྲུག་ཅན་དང་བཤད་གྲྭ་གསར་བཞེངས་མཛད་ནས་བླ་གྲྭ་སྟོན་འཁོར་ཉིས་བརྒྱ་ལྷག་ཙམ་བཞུགས་སྐབས་དུས་ངན་སྤྱི་ལོ༡༩༥༨ ལོར་ཟིང་འཁྲུག་ལངས་ནས་བླ་གྲྭ་བཅུ་གསུམ་རྒྱ་དམར་གྱི་མེ་མདའི་ཁྲོད་སྐུ་འདས་གྲོངས་སུ་ཤོར་ནས་དགོན་པའི་རྗེས་ཤུལ་ཙམ་ཡང་མེད་པར་གྱུར་ཏེ་མི་ལོ་ཉེར་ལྔའི་རིང་ལ་བདག་མེད་མགོན་མེད་ཡུལ་སྟོང་དུ་ལུས། སླར་ཡང་སྤྱི་ལོ༡༩༨༢ ལོ་ལ་རྒྱ་ནག་གཞུང་གིས་ཆོས་ལུགས་དད་པའི་རང་དབང་གི་སྒོ་མོ་ཕྱེས་ནས་རིམ་གྱིས་ད་བར་དུ་ཡར་རྒྱས་གྱི་རྣམ་པ་ཇེ་ལེགས་སུ་ཆགས་པ་རེད། སྒྲུབ་ཁང་དང་སྒྲུབ་གྲྭ་བཅས་ལའང་དར་རྒྱས་ཕུན་སུམ་ཚོགས་པ་རེ་ཡོད་པ་ཡིན། ད་སྐབས་དགོན་པའི་ནང་དུ་བཤད་གྲྭའི་གྲྭ་པ་མང་པོ་བཞུགས་ཡོད་ལ། གཞན་ཡང་རི་ཁྲོད་དང་ཆོས་སྡེ་ཁག་སོ་སོ་ལ་མཚམས་སྒྲུབ་གྲྭ་པ་བཅུ་ཕྲག་ཁ་ཤས་ཡོད་ཅིང་། ད་ཡོད་རྡོ་ནེ་དགེ་དགོན་ལ་བཙུན་མ་བཞི་བཅུ་ལྷག་ཙམ་དང་། བསམ་གཏན་ལྷུན་མཛེས་གླིང་ལ་བཙུན་མ་ཉིས་བརྒྱ་ཙམ་བཞུགས་ཡོད། ཁྱུང་ཚང་བཙུན་དགོན་དང་ཤ་ཆུང་པདྨ་ལྷ་ཚེའི་བཙུན་དགོན་དེ་ད་དུང་བསྐྱར་གསོ་མ་ཐུབ་པར་ལུས་ཡོད། ད་སྐབས་རབ་འབྱོར་དགོན་པའི་བསྐྱར་གསོའི་ཐད་ཀྱི་བྱ་བ་ཡོངས་རྫོགས་དེ་རབ་འབྱོར་སྐུ་ཕྲེང་བཞི་པས་ཐུགས་འགན་བཞེས་ཀྱིན་ཡོད་ལ། རྡོར་སློབ་ཉི་མ་བཀྲ་ཤིས་མཆོག་གིས་བླ་མའི་བཀའ་ལྟར་སྨི་བཞི་བརྒྱ་ཅན་གྱི་ལྷ་ཁང་དང་། སྨན་ཁང་། ཇ་ཁང་སོགས་ཀྱང་བཞེངས་ཡོད་པ་ཡིན། སྔར་བཞིན་བླ་མའི་དགོངས་བཞེད་ལྟར་དུ་གདུང་སྲས་བསྟན་འཛིན་འཇིགས་མེད་ཀྱིས་ཀྱང་བཤད་གྲྭ་དང་། དེའི་གྲྭ་ཤག ཟངས་མདོག་དཔལ་རི་སོགས་ཀྱང་བཞེངས་བསྐྲུན་བྱས་པ་ཡིན་ནོ། །
