སྒྲུབ་བརྒྱུད་ཀརྨ་ཀམ་ཚང་གི་གདན་ས་ཆེན་པོ་ཡངས་པ་ཅན་གྱི་ལོ་རྒྱུས་མདོར་བསྡུས།
༡༽གདན་ས་འདི་ཉིད་ཇི་ལྟར་ཕྱག་བཏབ་ཚུལ།
དེ་ཡང་ཐམས་ཅད་མཁྱེན་པ་༧ཀརྨ་ཞྭ་དམར་པ་སྐུ་ཕྲེང་གཉིས་པ་དཔལ་ལྡན་མཁའ་སྤྱོད་དབང་པོས་ཇི་ལྟར་ལུང་བསྟན་པ་བཞིན། གཉན་ཆེན་ཐང་ལྷ་དང་གངས་དཀར་ཤ་མེད་མ་གཙོ་བོ་བྱེད་པའི་གཉན་འཁོར་སུམ་བརྒྱ་དྲུག་བཅུས་མུ་ཁྱུད་ལྟར་ཡོངས་སུ་སྐོར་བའི། སྟོད་ལུང་ཕུ་གནམ་གཞུང་ཞེས་པའི་ས་ཆར། གླང་ཆེན་བག་ཉལ་ལྟ་བུ་འབྲང་རྒྱས་ཀྱི་རི་བོའི་ངོས། ས་དཔྱད་ཕུན་སུམ་ཚོགས་པའི་གནས་དེར།
ཀརྨ་ཞྭ་དམར་བཞི་པ་སྤྱན་སྔ་ཆོས་ཀྱི་གྲགས་པ་ལ། མི་དབང་དོན་ཡོད་རྡོ་རྗེ་དང་ས་སྐྱོང་རིན་ཆེན་རྒྱལ་མཆོག་གཙོས་གཞུང་འབྲེལ་གྱི་དཔོན་རིགས་རྣམས་པས་སྦྱིན་བདག་མཛད་ཅིང་། སྤྱི་ལོ་༼༡༥༠༣༽སྟེ་རབ་བྱུང་བརྒྱད་པའི་ཆུ་ཕག་ལོ་ཟླ་བ་བཞི་པའི་ཚེས་བཅུ་དགུའི་ཉིན་ཕྱག་བཏབ་བོ། །
༢༽ གདན་ས་འདི་ཉིད་འཕེལ་འགྲིབ་ཇི་ལྟར་བྱུང་ཚུལ།
ཡངས་པ་ཅན་གྱི་ཆོས་སྡེ་འདི་ཉིད་དུ་ཀརྨ་ཞྭ་དམར་ནག་རིམ་བྱོན་དང་། གདན་ས་འདིའི་མཁན་ཆེན་སྣར་ཐང་བ་ཤེས་རབ་དཔལ་ལྡན་ནས་གོ་ཤྲི་ཀརྨ་དོན་གྲུབ་སྙིང་པོའི་བར་མཁན་རབས་ཉེར་ལྔ་སོགས་ཀྱིས་ཆོས་ཀྱི་འཁོར་ལོ་རྒྱ་ཆེར་བསྐོར་བར་རྟེན། འགྲོ་མགོན་བཀའ་བརྒྱུད་པའི་གདན་སའི་གཙོ་བོར་གྱུར། གྲུབ་ཐོབ་ཀརྨ་ཆགས་མེད་དང་མཁན་ཆེན་ཀརྨ་ཕྲིན་ལས་སོགས་སྐབས་དེའི་མཁས་གྲུབ་གཉིས་ལྡན་གྱི་སྐྱེས་བུ་ཕལ་ཆེར་གནས་འདི་ནས་ཤེས་རབ་ཀྱི་ལོ་འདབ་རྒྱས་ཏེ་མཁས་པའི་གོ་འཕོང་བརྙེས། སྒྲུབ་ཁང་ཀརྨ་ཀུན་བཟང་གླིང་དུ་ཐུན་མོངས་དང་ཐུན་མིན་གྱི་བློ་སྦྱོང་སྔོན་དུ་སོང་བའི་ཐོག ཐབས་ལམ་ན་རོ་ཆོས་དྲུག་དང་། གྲོལ་ལམ་ཕྱག་རྒྱ་ཆེན་པོའི་ཉམས་ལེན་ཚུལ་བཞིན་བྱས་པར་རྟེན། རིམ་གཉིས་ཟབ་མོའི་རྣལ་འབྱོར་ལ་བརྟན་པ་ཐུབ་པའི་གྲུབ་བརྙེས་ཀྱི་ཚང་ཆེན་རྡོལ་ཏེ། རྒྱ་བོད་ཧོར་འཇང་སོགས་ཡུལ་གྲུ་ཀུན་ཏུ་གདན་ས་འདིའི་ཕྲིན་ལས་ཀྱི་འོད་སྣང་དཀར་པོས་མ་ཁྱབ་པ་མེད་པར་གྱུར། རབ་བྱུང་བཅུ་གསུམ་པའི་ནང་། པཎ་ཆེན་དྲུག་པའི་གཅུང་པོ་ཞྭ་དམར་སྐུ་ཕྲེང་བཅུ་བ་ཆོས་གྲུབ་རྒྱ་མཚོ་ལ་ཕྱོགས་ཞེན་ཅན་འགས་གཞུང་ས་དང་དབྱེན་སྦྱོར་བྱས་པར་རྟེན། གོར་དམག་བོད་ལ་དྲངས་པའི་ཉེས་ཁག་འགེལ་ནས་གདན་ས་འདི་ཉིད་དགའ་ལྡན་ཁོངས་སུ་བཙན་བསྒྱུར་བྱས་པ་དང་། ཞྭ་དམར་པའི་ཡང་སྲིད་ཁྲི་ལ་བཀོད་མི་ཆོག་པ་བྱས་ཀྱང་སྤྲུལ་པའི་སྐུ་ཡི་འཕྲིན་ལས་ནི་སུ་དང་གང་གིས་འགོག་པ་མི་ནུས་པས། སྐུ་ཕྲེང་བཅུ་གཅིག་པ་ཀརྨ་པ་ཐེག་མཆོག་རྡོ་རྗེའི་དབོན་པོ་ཆོས་དབང་རིན་པོ་ཆེ་དང་། བཅུ་གཉིས་པ་རྒྱལ་དབང་བཅོ་ལྔ་པའི་གདུང་སྲས་འཇམ་དབྱངས་རིན་པོ་ཆེ་རྒྱལ་དབང་བཅོ་ལྔ་པ་གང་ཉིད་ཀྱིས་ངོས་འཛིན་མཛད་ནས། གདན་ས་ཡངས་པ་ཅན་དུ་ཡང་ཡང་ཕེབས་ནས་དབང་ཆོས་སོགས་གནང་། བཅུ་གསུམ་པ་འཕྲིན་ལས་ཀུན་ཁྱབ། བཅུ་བཞི་པ་རྒྱལ་དབང་རིག་པའི་རྡོ་རྗེས། དབོན་པོ་མི་ཕམ་ཆོས་ཀྱི་བློ་གྲོས་ངོས་འཛིན་མཛད་ནས་ཁྲིར་འདོན་ཆོག་པའི་སྙན་གསེང་ཞུས་པ་ལྟར་བཀའ་འཁྲོལ་ཐོབ་ནས། སྤྱི་ལོ་༡༩༥༦ལོར་མཚུར་ཕུའི་མངའ་ཁང་དུ་ཁྲི་འདོན་གནང་བ་སོགས་འཛམ་གླིང་ཡོངས་གྲགས་སུ་གྱུར། སྤྱི་ལོ་༼༡༩༥༩༽ལོར་རིག་གནས་གསར་བརྗེའི་སྐབས་སུའང་སྤྱི་ཡོངས་ལྟར་འཐོར་ཞིག་སོང་།
༣༽ གདན་ས་འདི་ཡི་ད་ལྟའི་གནས་བབས།
སྤྱི་ལོ་༼༡༩༨༢༽ལོར་ཆོས་དད་རང་མོས་ཀྱི་སྲིད་ཇུས་འོག་དགོན་པ་ཡང་སྐྱར་ཉམས་གསོ་བྱེད་ཆོག་པ་བྱུང་སྐབས་དགོན་པའི་ལས་བྱེད་དང་ཆོས་དད་མང་ཚོགས་བློ་མ་གྲོས་བསམ་པ་གཅིག་མཐུན་གྱིས་སྔོན་མ་བཞིན་ཀརྨ་བཀའ་བརྒྱུད་པའི་གདན་ས་ཉིད་དུ་འཛུགས་བསྐྲུན་དགོས་པའི་ཐུགས་ཐག་བཅད་ནས་གསར་བཞེངས་གནང་། དེ་ནས་ད་ལྟའི་བར་བཀའ་རྒྱུད་རང་ལུགས་ཀྱི་མཐོང་བ་རྒྱུད་པའི་ཕྱག་ལེན་དང་། མདོ་སྔགས་གཞུང་ཆེན་ཁག་ལ་འཆད་ཉན། སྒྲུབ་གྲྭའི་ཉམས་བཞེས་སོགས་གང་སྤྱིའི་ཐད། རྒྱལ་དབང་དཀོན་མཆོག་ཡན་ལག་དང་། གར་དབང་ཆོས་ཀྱི་དབང་ཕྱུག་སོགས་ཀྱིས་བཤད་སྒྲུབ་ལས་གསུམ་གྱིས་མཛད་འཕྲིན་ཇི་ལྟར་སྐྱོང་བ་གཞིར་བཞག་དེང་དུས་ཀྱི་རིག་གནས་རྣམས་ཀྱིས་ཟུར་རྒྱན་ནས་ཀརྨ་བཀའ་བརྒྱུད་ཀྱི་རིང་ལུགས་དྲི་མ་མེད་པ་འཛིན་སྐྱོང་སྤེལ་གསུམ་བྱེད་བཞིན་པ་ཙམ་དུ་མ་ཚད།
སྤྱི་ལོ་༼༢༠༡༣༽ལོར་དགོན་འདི་རང་སྐྱོང་ལྗོངས་རིམ་པའི་རིག་དངོས་སྲུང་སྐྱོབ་སྡེ་ཚན་དུ་ཚུད།༼༢༠༡༨༽ལོར་ཡངས་ཅན་དབྱར་འཆམ་ཡང་རང་སྐྱོང་ལྗོངས་རིམ་པའི་དངོས་མིན་རིག་གནས་ཤུལ་བཞག་གི་ཁོངས་སུ་ཚུད་ཡོད། །གདན་སའི་མཁན་པོ་པདྨ་གེ་སར་ནས་བྲིས།
ཡངས་པ་ཅན་དགོན་པའི་ངོ་སྤྲོད་མདོར་བསྡུས།
