དཔལ་གླ་བྲོ་བསམ་འགྲུབ་ལྷ་ལྡན་ཆོས་འཁོར་དར་རྒྱས་གླིང་ནི་མདོ་ཁམས་ལྷོ་ཟླ་བོད་ཀྱི་གནས་ཆེན་ཉེར་ལྔའི་ཡ་གྱལ་རྒྱམ་རྒྱལ་རྡོ་ཏི་གངས་དཀར་གྱི་མདུན་རོལ་འབངས་རྒྱམ་ཡུལ་སྡེ་རུ་ཆགས་ཡོད། སྤྱི་ལོ་༡༤༡༩ཡས་མས་ལ་༸རྒྱལ་དབང་ཀརྨ་པ་ལྔ་པ་དེ་བཞིན་གཤེགས་པའི་སློབ་མ་དྲུང་རྨ་སེ་བློ་གྲོས་རིན་ཆེན་སྟོན་འཁོར་དང་བཅས་པ་གནས་ཆེན་རྒྱམ་རྒྱལ་རྡོ་ཏི་རུ་ཕེབས་ཤིང་ཡུལ་འདིར་སྒྲུབ་བརྒྱུད་ཀྱི་བསྟན་པ་དར་ཞིང་རྒྱས་པའི་རྟེན་འབྲེལ་མང་དུ་བྱུང་ཞིང་། ཕེབས་ལམ་ནས་འཁོར་ལོ་བདེ་མཆོག་གི་ལྷ་ཚོགས་རྣམས་ཀྱིས་ཚོགས་གར་འཁྲབ་པར་གཟིགས་པས་གླ་བ་བདུན་གྱིས་བྲོ་འཁྲབ་པ་མཐོང་ཟེར་བར་རྟེན་འབྲེལ་ལེགས་པར་དགོངས་ནས་གནས་དེ་རུ་དགོན་ས་བཏབ་སྟེ་གླ་བྲོ་བསམ་འགྲུབ་ལྷ་ལྡན་ཆོས་འཁོར་དར་རྒྱས་གླིང་ཞེས་བཏགས། དྲུང་ཉིད་ཀྱིས་སྒྲུབ་གནས་ཀྱང་མཛད་པས་ད་ལྟའང་རྨ་སེའི་སྒྲུབ་ཕུག་ཟེར་བ་ཡོད། དང་ཐོག་བཀའ་བརྒྱུད་ཟུར་ལུགས་ཡིན་ནའང་ཕྱིས་༸བྱམས་མགོན་སི་ཏུ་པདྨ་ཉིད་བྱེད་མཆོག་གིས་ཟུར་མང་ཆེ་ཆུང་གང་ནའང་ཟུར་ལུགས་མིན་པའི་ཀཾ་ཚང་རང་ལུགས་མེད་པས་མ་འོངས་བཤད་སྒྲུབ་ཀྱི་སྡེ་རྒྱས་པར་གཟིགས་ནས་ཀཾ་ཚང་རང་ལུགས་སུ་བསྒྱུར་བས་ད་ལྟ་ཟུར་ལུགས་མ་ཡིན་པའི་ཀརྨ་བཀའ་བརྒྱུད་ཡིན། གཞན་ཡང་དགོན་འདིར་རྒྱལ་དབང་ཀརྨ་པ་རིག་པའི་རྡོ་རྗེ་ཡན་ཀརྨ་པའི་སྐུ་ཕྲེང་རིམ་བྱོན་དང་། ༸བྱམས་མགོན་སི་ཏུ་པདྨ་ཉིན་བྱེད་དང་། སི་ཏུ་པདྨ་དོན་ཡོད་གྲུབ་པ་སོགས་སི་ཏུའི་སྐུ་ཕྲེང་རིམ་བྱོན། འཇམ་དབྱངས་མཁྱེན་བརྩེ་དབང་པོ་ཕེབས་ཏེ་དགོན་པའི་བཅའ་ཡིག་མཛད་ནས་མ་འོངས་བསྟན་པ་རྒྱས་པར་ལུང་དུ་བསྟན་པ་སོགས་རིས་མེད་ཀྱི་སྐྱེས་ཆེན་དུ་མས་ཞབས་ཀྱིས་བཅགས་ཤིང་བྱིན་གྱིས་བརླབས་པར་མཛད།དགོན་འདིའི་མཆོག་སྤྲུལ་གར་ཐོས་སྤྲུལ་སྐུ་ཕྲེང་རིམ་བྱོན་དང་། ནོར་བུ་སྤྲུལ་སྐུ་སྐུ་ཕྲེང་རིམ་བྱོན། མཁན་ཆེན་མི་ཉག་ཨ་དཀར་ཆོས་རྒྱལ་ནས་ད་ལྟའི་སྐྱབས་རྗེ་ཨ་ཆོས་སྤྲུལ་སྐུའི་བར་སྐུ་ཕྲེང་རིམ་བྱོན། ཕུར་པ་བླ་མ་སྐུ་ཕྲེང་རིམ་བྱོན་བཅས་དམ་པའི་སྐྱེས་བུ་མང་དུ་བྱོན། དགེ་འདུན་གྱི་སྡེ་ཡང་འཕེལ།གཙུག་ལག་ཁང་དང་། རྟེན་འགངས་ཆེན་མང་དུ་བཞུགས་ཀྱང་༡༩༥༨ལོའི་དུས་ཟིང་ཆེན་མོའི་སྐབས་ཕལ་ཆེ་བ་རྩ་གཏོར་དུ་སོང་། དུས་ཟིང་རྗེས་༸སྐྱབས་རྗེ་ཨ་ཆོས་སྤྲུལ་སྐུ་གཙོས་དགོན་པའི་གྲྭ་རྒན་རྣམ་པ་དང་ཡུལ་སྡེ་ཚོས་འདུ་ཁང་དང་སྒྲུབ་ཁང་། སྒྲུབ་མཆོད་སོགས་བསྐྱར་གསོ་མཛད་དེ་བསྟན་པ་སླར་གསོ་ལེགས་པོ་བྱུང་། ༢༠༡༠ལོར་ཡུལ་ཤུལ་ས་འགུལ་ཆེན་མོའི་སྐབས་དགོན་འདིའི་འདུ་ཁང་དང་མགོན་ཁང་གྲྭ་ཤག་སོགས་ལ་གནོད་སྐྱོན་ཚབ་ཆེན་བྱུང་བས་སླར་རང་དགོན་གྱི་མཆོག་སྤྲུལ་གར་ཐོས་རིན་པོ་ཆེ་དང་། ནོར་བུ་སྤྲུལ་སྐུ་རིན་པོ་ཆེ། སྐྱབས་རྗེ་ཨ་ཆོས་སྤྲུ་སྐུ་རྣམ་གསུམ་གཙོས་སྡེ་དགོན་གཉིས་ཀྱིས་ནུས་ཤུགས་ཡོད་དགུ་ཕྱུང་བ་དང་། གཞན་འབྲེལ་ཡོད་གོང་རིམ་བཅས་ཀྱིས་གདན་ས་གསར་རྒྱག་གི་ལས་ལ་འབད་པ་ཆེན་པོས་གཙུག་ལག་ཁང་ཆེན་མོ་མི་ཕམ་དགྱེས་པའི་གཞལ་མེད་ཁང་དང་། བཤད་གྲྭ་བཤད་སྒྲུབ་བསྟན་འཕེལ་གླིང་། ནཱ་རོ་ཆོས་དྲུག་སྒྲུབ་ཁང་། གྲོ་ལོད་སྒྲུབ་ཁང་། ཕུར་པ་སྒྲུབ་ཁང་། མགོན་པོའི་སྒྲུབ་ཁང་སྟེ་སྒྲུབ་ཁང་ཁག་བཞི།བཙུན་མའི་དགོན་པ་གཅིག བླ་བྲང་ཁག་བཞི། དགོན་པའི་ཡིག་གྲྭ། དཔེ་མཛོད་ཁང་། གྲྭ་ཤག དགོན་པའི་གཞུང་དོན་ཁང་སོགས་སྔ་ལས་རྒྱ་བསྐྱེད་ཀྱིས་གསར་བཞེངས་ལེགས་གྲུབ་བྱུང་སྟེ་དེང་གི་ཆར་དགོན་པའི་སྤྲུལ་སྐུ་རྣམ་པ་དབུར་བཞུགས་པ་དང་། ལྷག་པར་མདོ་སྔགས་རབ་འབྱམས་པ་མཁན་པོ་ཚེ་རིང་བདེ་ཆེན་རང་དགོན་དུ་གདན་དྲངས་ནས་བཤད་གྲྭའི་ལས་ཐོག་མཁན་ཆེན་དང་དགོན་པའི་དབུ་འཛིན་གནང་ཐོག་བཤད་སྒྲུབ་ཀྱི་སྡེ་སྔ་ལས་འཐུས་སྒོ་ཇེ་ཚང་གིས་བཤད་གྲྭའི་འཆད་རྩོད་རྩོམ་གསུམ་ཚད་ལྡན་དང་།སྒྲུབ་མཆོད་ལ་རང་ལུགས་ཀྱི་བཀའ་སྲོལ་ཡི་དམ་ཕག་བདེ་རྒྱལ་གསུམ།མགོན་པོ། ཐུགས་རྗེ་གསང་འདུས། ཕུར་སྒྲུབ། གྲོ་ལོད། ཞི་ཁྲོ། ཀུན་རིགརྡོར་སེམས། ཞིང་སྒྲུབ། ཚེ་སྒྲུབ་སོགས་སྔོན་གྱི་དམ་པ་གོང་མའི་ཕྱག་སྲོལ་དང་། ཐོས་བསམ་སྒོམ་པའི་ཉམས་ལེན་ཏེ་འདོར་ན་བཤད་སྒྲུབ་འཁོར་ལོ་གསུམ་གྱིས་རང་ལུགས་དྭགས་པོ་བཀའ་བརྒྱུད་ཀྱི་བཀའ་སྲོལ་དར་ཞིང་རྒྱས་པས་གནས་བཞིན་པ་ལགས་སོ།།
