༄༅། །སྨན་སྡོང་བཙུན་དགོན་བསམ་བསྟན་གླིང་ནི། སྟོད་མངའ་རིས་མཚོ་ཆེན་རྫོང་ཁོངས་སུ་ཆགས་ཤིང་ཀརྨ་ཀཾ་ཚང་རིང་ལུགས་འཛིན་པའི་བཙུན་དགོན་ཞིག་ཡིན་ནོ། མཚོ་ཆེན་རྫོང་ཆགས་ཡུལ་ནས་སྤྱི་ལེ་བཅོ་ལྔ་ལྷག་ཙམ་ན་ཡོད། བླ་མ་ངེས་དོན་བསྟན་རྒྱས་ཀྱི་གཅུང་མོ་ཨ་ནེ་ཀུན་བཟང་སྒྲོལ་མས་སྤྱི་ལོ་༡༨༨༥ ལོར་ཕྱག་བཏབ་དེ་ནས་ཁོང་གི་གཅུང་མོ་ཨ་ནེ་ཀརྨ་ཆོས་ཉིད་དང་ལྷན་སྨྱུང་གནས་དང་ཡིད་དམ་ཐུགས་རྗེས་ཆེན་པོས་སྒོམ་བཟླས་ལྷུར་བླང་ཞིང་སྒྲུབ་པ་ཉམས་བཞེས་མཛད། གཞན་ཡང་འོད་དཔག་དང་སྒྲོལ་མ་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་པའི་སྒྲུབ་ཐབས་དམ་པ་སྤྱོད་ཡུལ་ཟབ་མོ་བཅས་ཀྱིས་མཚམས་བརྙེན་སྒྲུབ་ཀྱི་དུས་འདའ་ཞིང་ཉིན་རེ་ཟས་ཐེངས་གཅིག་ལས་མི་བཞེས་དེ་ཡང་དཀར་སྐྱོང་དམར་སྤོང་ཁོ་ན་བསྟེན་དོ། མདོར་ན་སེམས་ཅན་ལ་གནོད་འཚེའི་རིགས་དངོས་ཤུགས་རྒྱུད་གསུམ་ནས་ཟློག་པར་བྱེད་པའི་རྒྱལ་སྲས་བྱང་ཆུབ་དཔའི་ངང་ཚུལ་ལ་གནས་སོ། དོན་མེད་ཀྱི་ངག་ཀྱལ་དང་འགྲོ་འཆག་གི་སྤྱོད་ལམ་སྤང་ཞིང་ཐ་ན་དགོན་པའི་གྱང་རིའི་ཕྱི་ཙམ་ཡང་མི་ཕེབས། ཚེ་དང་སྒྲུབ་པ་མཉམ་ཞིང་ཕྱག་རྒྱ་ཆེན་པོའི་རྟོགས་པ་མངོན་དུ་སྒྱུར་པའི་རྣལ་འབྱོར་མ་ཞིག་ཡོད་དོ། དུས་འགྱུར་སྐབས་སུ་དགོན་པ་ཉམས་རྒུད་ཕྱིན་ཀྱང་སྤྱི་ལོ་༡༩༨༤ ལོར་བླ་མ་བློ་གྲོས་དང་བླ་མ་བསྟན་དར་རྣམ་གཉིས་ཀྱིས་བཙུན་དགོན་སླར་ཡང་བསྐྱར་གསོ་མཛད་དོ། སྤྱི་ལོ་༢༠༠༢ ལོར་དགོན་པའི་སྒོ་མཆོར་སོགས་གསར་བཞེངས་གནང་། སྤྱི་ལོ་༢༠༠༤ ལོར་དགོན་པའི་ལྕགས་རི་དང་སྨྱུང་གནས་ལྷ་ཁང་གཉིས་གསར་བཞེངས་མཛད། ད་ལྟའི་ཆར་འཁོར་ལོ་གསུམ་ཀྱི་བྱ་བའི་དུས་འདའ་ཞིང་རྒྱལ་བསྟན་དར་རྒྱས་ཡོང་སླད་དུ་བསྟན་པ་འཛིན་སྐྱོང་སྤེལ་གསུམ་བྱེད་བཞིན་པའོ།།
