ལྷོ་ཚ་བ་རོང་རྩྭ་ཐང་དགོན་དམ་ཆོས་སྐྱེད་ཚལ་གླིང་།
ཕྱི་ལོ་༡༩༤༠ ལོར་གྲུབ་པའི་དབང་ཕྱུག་པདྨ་ཆོས་དབྱིངས་རང་གྲོལ་མཆོག་གིས་དགོན་པ་འདི་ཉིད་ཕྱག་བཏབ། ཚ་བ་རོང་དང་། དངུལ་ཆུ་ཁ། གོ་འཇོ་སོགས་ཡུལ་ཕྱོགས་མང་པོ་ནས་འདུས་པའི་སློབ་མའི་གྲངས་སུམ་བརྒྱ་ལས་བརྒལ་བར་བྱུང་། དེ་དག་གིས་འོད་གསལ་རྫོགས་པ་ཆེན་པོའི་ཉམས་ལེན་དང་། གསར་རྙིང་གི་ཡི་དམ་ཞི་ཁྲོའི་བསྙེན་སྒྲུབ་ལས་གསུམ་ལ་བརྩོན་པར་མཛད་པས་བསྟན་དགོན་དར་ཞིང་རྒྱས་པར་གྱུར། ༡༩༥༩ ལོར་བསྟན་དགོན་ལ་ཉམས་རྒུད་ཆེན་པོར་སོང་། ༡༩༩༥ ལོར་གྲུབ་དབང་སྙན་པའི་འབྲུག་གྲགས་མཆོག་གིས་ཚ་བ་རོང་པའི་ཡུལ་མིའི་རེ་བ་ལྟར་དུ་དགོན་པ་བསྐྱར་གསོ་མཛད་པས་ཚ་བ་སྒང་དང་། རྫ་སྟོད། འབྲོག་སྒང་། འབའ་བ། ཚ་བ་རོང་སོགས་ཡུལ་ལུང་དུ་མ་ནས་སློབ་མ་མང་པོ་འདུས། ཀཾ་ཚང་རང་ལུགས་ཀྱི་རྒྱུད་སྡེ་དང་སྒྲུབ་ཐབས་རྣམས་ཀྱི་དབང་ལུང་ཁྲིད་གསུམ། ཕྱག་ཆེན་དང་ཆོས་དྲུག་སོགས་ཀྱི་ཁྲིད་གནང་ཤིང་བསྟན་པ་རྒྱས་པར་གྱུར་སྐབས། སྲིད་གཞུང་ལས་དགོན་པ་བསྐྱར་གསོའི་ཆོག་མཆན་མ་ཐོབ་རྐྱེན་གྱིས་གཙུག་ལག་ཁང་སྒོ་རྒྱབ་པ་སོགས་བྱས་པས་ལོ་བཅུ་ཕྲག་གཅིག་ལྷག་ཙམ་ལ་དགོན་པ་སྟོང་པར་གྱུར། ༢༠༡༡ ལོར་སྲིད་གཞུང་ལས་དགོན་པ་བསྐྱར་གསོའི་ཆོག་མཆན་ཐོབ། དེ་ནས་བླ་མ་མི་འགྱུར་བཟང་པོ་དང་། ཆོས་ཀྱི་སེང་གེ་སོགས་ཀྱིས་དགོན་པ་བསྐྱར་གསོའི་ལས་ཀ་དབུ་བཟུང་སྟེ་ཐོག་མར་སློབ་གྲྭ་གསར་འཛུག་བྱས། དེ་ནས་བཟུང་གྲྭ་ཚང་འདུས་སྡེ་ཇེ་མང་དུ་གྱུར་ནས་༢༠༡༢ ལོར་གཙུག་ལག་ཁང་བཞེངས་པའི་དབུ་བཟུང་སྟེ་༢༠༡༦ ལོར་ཕྱི་ནང་གི་རྟེན་དང་བརྟེན་པ་བཅས་ལེགས་པར་གྲུབ། ༢༠༡༣ ལོར་བཤད་གྲྭ་དབུ་འཛིན་བྱས་ཏེ་མདོ་སྔགས་ཀྱི་གཞུང་ཆེན་རྣམས་འཆད་ཉན་གྱི་དབུ་ཚུགས། ༢༠༡༥ ལོར་ཆོས་དྲུག་སྒྲུབ་ཁང་གསར་བཞེངས་གྲུབ་ནས་ཕྱག་ཆེན་དང་ཆོས་དྲུག་སོགས་ཉམས་བཞེས་ཀྱི་དབུ་ཚུགས། ༢༠༡༦ ལོར་མགོན་ཁང་ཆེན་མོ་གསར་བཞེངས་ལེགས་པར་གྲུབ། ལོ་དེར་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་གིས་དགོན་པ་ལ་དམ་ཆོས་སྐྱེད་ཚལ། སློབ་གྲྭ་ལ་འཇམ་དབྱངས་དགའ་ཚལ། བཤད་གྲྭ་ལ་ལེགས་བཤད་སྐྱེད་ཚལ། སྒྲུབ་ཁང་ལ་བསམ་གཏན་སྐྱེད་ཚལ། མགོན་ཁང་ལ་བསིལ་བ་ཚལ་ཞེས་མཚན་གནང་། ལོ་རྟག་པར་བདེ་ཆེན་ཞིང་སྒྲུབ་དང་། དགེ་བསྙེན་ཆོས་ཚོགས། སྨོན་ལམ་ཆེན་མོ། མར་མི་དྭགས་གསུམ་དང་དུས་གསུམ་མཁྱེན་པའི་འདས་མཆོད། འདུལ་བ་གཞི་གསུམ་གྱི་ཕྱག་བཞེས། མགོན་སྒྲུབ་དགུ་གཏོར་ཆེན་མོ་གར་འཆམ་དང་བཅས་པ། རྡུལ་ཚོན་གྱི་དཀྱིལ་འཁོར་ལ་བརྟེན་པའི་མར་ལུགས་རྒྱུད་སྡེ་བཅུ་གསུམ་གྱི་སྒྲུབ་མཆོད་བཅས་འཚོགས་པའི་སྲོལ་ཚུགས་ཡོད།
ཀརྨ་རིག་གྲོལ་ནས།