གཞུ་སྨད་གཡའ་རི་མི་འགྱུར་བདེ་གླིང་དགོན་ནི་བོད་རབ་བྱུང་ལྔ་པའི་ཤིང་ཡོས་སྤྱི་ལོ་༡༣༡༥ལོར་འབྲི་གུང་གདན་རབས་དགུ་པ་ཉེར་བརྒྱད་རྡོ་རྗེ་རྒྱལ་པོ་དགུང་ལོ་ལྔ་བཅུར་ཕེབས་སྐབས་ཕྱག་བཏབ་གནང་མཛད། དེ་ནས་གདན་རབས་ཉེར་བདུན་པ་རྗེ་ཆོས་ཀྱི་ཉི་མས་བོད་རབ་བྱུང་བཅུ་གསུམ་ལྕགས་ཀྱི་ལོ་སྟེ་སྤྱི་ལོ་༼༡༧༨༠༽ལོར་ཉམས་གསོ་རྒྱ་བསྐྱེད་བཏང་སྟེ་དགོན་མིང་དུ་གཡའ་རི་མི་འགྱུར་བདེ་གླིང་ཞེས་མཚན་གསོལ།
སྐྱབས་མགོན་ཞི་བའི་བློ་གྲོས་ཀྱི་བཀའ་བསྐུལ་བཞིན་འབྲི་གུང་ཉི་ལྕང་བཤད་གྲྭའང་ཐོག་མར་གནས་འདིར་ལོ་ལྔ་དྲག་ཙམ་བཙུགས། དེའི་ཐོག་མའི་སྐབས་འབྲི་གུང་གི་དགོན་པ་གང་ས་ནས་གྲྭ་པ་འདུས་ཡོད་པ་དང་ལྷག་ཏུ་དཔའ་ཆུང་རྡོ་རྗེ་འཆང་དང་གཡའ་རིའི་སྒྲུབ་ཐོབ་ཇ་དབང་བསྟན་འཛིན་སོགས་སྐྱེས་ཆེན་མང་པོ་ཞིག་གནས་འདི་ནས་ཐོས་བསམ་མཐར་ཕྱིན་མཛད་ནས་སྒྲུབ་ཐོབ་བསམ་གྱི་མི་ཁྱབ་པ་ཡང་བྱུང་མྱོང་ཡོད། ཕྱིས་སླར་ཡང་འབྲི་གུང་ཉི་ལྕང་ནང་བསྟན་སློབ་གླིང་ གནས་དེར་སླར་གསོ་མཛད་ནས་ མཁན་ཆེན་དམ་པ་དཀོན་མཆོག་རྣམ་རྒྱལ་གྱི་དབུས་ས་གསུམ་ན་གྲགས་པའི་གྲུབ་ཐོག་དགེ་སློང་བཀྲ་ཤིས་རབ་བརྟན་སོགས་མཁས་དབང་མང་པོའི་སློབ་གཉེར་གནང་སའི་བཤད་གྲྭ་དེའི་རྒྱུན་ཡང་ད་ལྟ་གནས་དང་གནས་བཞིན་ཡོད།
ཟབ་ལམ་བླ་སྒྲུབ་ཉམས་བཞེས་གཙོ་བོར་བྱེད་པའི་སྒྲུབ་གྲྭའང་རྒྱས་པར་མཛད་ནས་འཕྲིན་ལས་བསམ་གྱི་མི་ཁྱབ་པར་གནས་པར་གྲགས་སོ།།
