རྗེ་དཔའ་བོའི་གདན་ས་གནས་ནང་དགོན་དེ་ནི་གྲོང་ཁྱེར་ལྷ་ས་ནས་སྤྱི་ལེ་དྲུག་ཅུ་ཙམ་གྱི་སར་དཔལ་གྱི་འོག་མིན་མཚུར་ཕུའི་མདར་ཆགས་ཡོད། རྒྱ་མཚོའི་ངོས་ནས་མཐོ་ཚད་རྨིད་༤༢༩༠ཆོས་བྱུང་ལོ་རྒྱུས་ཁག་ནང་མཚུར་གནས་ནང་དང་། གནས་ནང་རྒྱལ་བའི་རི་ཁྲོད་ཅེས་འཁོད། ཀུན་གཟིགས་ཞྭ་དམར་སྐུ་ཕྲེང་དང་པོ་རྟོགས་ལྡན་གྲགས་སེང་གིས་དགུང་ལོ་སོ་དགུ་པ་ལྕགས་བྱ་༡༣༢༡ ལོར་ཕྱག་བཏབ། རྟེན་འབྲེལ་དུ་དགོངས་ནས་མཚན་ཡང་གནས་ནང་དུ་བཏགས།
གར་དབང་ལྔ་པ་མཆོག་གིས་གནས་དེར་རྟོགས་ལྡན་དར་མ་རྒྱལ་མཚན་དང་། གཡག་སྡེ་པན་ཆེན། རྟོགས་ལྡན་མགོན་པོ་རྒྱལ་མཚན་སོགས་དབུས་གཙང་ཁམས་གསུམ་ནས་ཚོགས་པ་དྲུག་བརྒྱ་ཙམ་བསྡུས་པ་ལ་ནཱ་རོ་ཆོས་དྲུག་དང་ཡན་ལག་དྲུག་གི་ཁྲིད་བསྐྱངས། སྒོམ་ཆེན་ཉམས་རྟོགས་དང་ལྡན་པ་སྒྲུབ་ཚུགས་ཅན་མང་དུ་ཐོན། མཁས་གྲུབ་དར་རྒྱལ་བ་དང་རྗེ་ཞྭ་དམར་སྐུ་ཕྲེང་གཉིས་པ། རྟོགས་ལྡན་ཡེ་ཤེས་དཔལ། བླ་མ་བསོད་ནམས་འབུམ་ལྕགས་རྡོ་བླ་མ་རྒྱ་མཚན། རྗེ་ཞྭ་དམར་གསུམ་པ་དང་བཞི་པ་བཅས་ནས་རིམ་པར་གདན་ས་འཛིན།
རྗེ་གོང་མར་མི་ཕམ་སྲས་པོས་ལུང་བསྟན་པ་བཞིན་རྗེ་སྤྱན་སྔ་ཆོས་གྲགས་ཀྱིས་ཤིང་སྦྲུལ་ལོར་གནས་ནང་མཆོད་ཁང་གསར་མ་དང་བྱམས་པའི་སྐུ་བཞེངས། གཙུག་ལག་ཁང་ཡོངས་ལ་སཙྪའི་ལྕགས་རི་སོགས་མཛད། དེ་ནས་ཞྭ་དམར་ཅོད་པན་འཛིན་པ་བདུན་པ་ཡེ་ཤེས་སྙིང་པོའི་དུས་ཀར་དགོན་དགེ་སྒྱུར་སྐབས་དགོན་པ་དེ་ཡང་དེ་ཁོངས་སུ་ཚུད། དེ་དང་འདྲ་བར་རྗེ་དཔའ་བོ་རིམ་བྱོན་གྱི་གདན་ས་གྲོ་བོ་ལུང་དང་སྲས་མཁར་སྤྲུལ་པའི་ཕོ་བྲང་། ལྷ་ལུང་དགོན་སོགས་ཀྱང་དགེ་ལུགས་སུ་བསྒྱུར། རྗེ་དཔའ་བོ་ལྔ་པ་གཙུག་ལག་ཕྲིན་ལས་རྒྱ་མཚོར་གོང་ས་ལྔ་པ་ཆེན་པོས་ཧུ་ཐོག་ཐུའི་དབུ་གནས་སོགས་དང་གནས་ནང་དགོན་དེ་ཉིད་གདན་སར་གནང་། དེ་ནས་བཟུང་རྗེ་དཔའ་བོ་རིམ་བྱོན་གྱིས་གདན་སར་གྱུར།
བསྐྱར་དར་སྐབས་སྐྱབས་རྗེ་དཔའ་བོ་བཅུ་པ་ཆེན་པོ་དང་སྐྱབས་རྗེ་སྒྲུབ་དཔོན་བདེ་ཆེན་རིན་པོ་ཆེའི་ཐུགས་དགོངས་བཞིན་བླ་མ་ཚེ་དབང་བཀྲ་ཤིས་དང་། སྔོན་མའི་གྲྭ་རྒན་རྣམས་མཉམ་རུབ་ཀྱིས་བསྐྱར་བཞེངས་དབུ་བཙུགས། རིམ་པར་རྗེ་དཔའ་བོ་གཙུག་ལག་སྨྲ་བའི་སྒྲ་དབྱངས་མཆོག་གིས་བླ་མེད་ཐུགས་རྗེའི་བདག་རྐྱེན་ལས་གཙུག་ལག་ཁང་རྟེན་གསུམ་རྨང་ནས་ཉམས་གསོ་དང་། བཤད་སྒྲུབ་ཀྱི་བྱ་བ་ཡང་སྒྲུབ་ཁང་ཆེ་ཆུང་གསུམ་ལ་ཐུན་མོང་ལམ་གྱི་རིམ་པ་ནས་རྒྱུད་སྡེ་ཁག་དང་ཐུན་མིན་ཐབས་གྲོལ་གྱི་གདམས་པ་རྣམས་གོང་མའི་ཕྱག་རྒྱུན་ཇི་ལྟ་བར་ཉམས་ལེན་དང་། དགེ་འདུན་ཚོགས་གྲྭ་རྣམས་ནས་ནག་རྒྱལ་ཕག་གསུམ་དང་བདེ་དགྱེས་འཇིགས་སོགས་མར་སྟོན་ཆེན་པོའི་རྒྱུད་སྡེ་ཁག་གཙོ་བོར་བྱས་པའི་སྒྲུབ་མཆོད་ཁག་སུམ་ཅུ་ལ་ཉེ་བར་དཔལ་མཚུར་ཕུའི་ལུགས་ལྟར་ཚོགས་ནས་དྭགས་བརྒྱུད་སྒྲུབ་པའི་བསྟན་པ་འཛིན་བཞིན་པ་ལགས་སོ།། །།
