དགོན་པ་འདི་ཡི་མཚན་དངོས་ནི་ངེས་དོན་ཆོས་འཁོར་གླིང་ངམ། གསང་ཆེན་ཆོས་འཁོར་གླིང་ཞེས་བྱ། དེ་ཡང་ཐོག་མར་ད་ལྟའི་གཙུག་ལག་ཁང་འདི་ཡི་མལ་དུ། དཀར་ཕྱོགས་ལེན་སའི་ལྷ་ཁང་ཞིག་དང་དེ་ཡི་ཟུར་དུ་པད་པུང་ཞིག་བཅས་ཡོད་པ་ལ། ཕྱིས་ཝ་རྫོང་ཞེས་པ་དགེ་བསྙེན་ཝ་རུ་ཎའི་ཡང་རྫོང་དུ་ཆགས་པ་སྐད་པས། མིང་ཝ་རྫོང་དུ་ཆགས། ཝ་རྫོང་གྲོང་ཚོ་དེར་སྔགས་རྒྱུད་ཚང་ཟེར་བའི་སྔགས་པའི་བརྒྱུད་པ་མ་ཆད་པའི་དུད་ཚང་གཅིག་ཡོད་པ་ལ། བུ་དར་རྒྱས་རྒྱ་མཚོ་ཞེས་པ་ཞིག་བྱུང་བ་དེ་ཉིད་སྡེ་དགེ་དཔལ་སྤུངས་སུ་བྱོན་ནས། ༧ བྱམས་མགོན་ཏཱ་ཡི་སི་ཏུ་པདྨ་ཉིན་བྱེད་དབང་པོ་གཙུག་ཏུ་བསྟེན། དཔལ་སྤུངས་ཀྱི་སྒྲུབ་གྲྭར་ལོ་གསུམ་དུ་སྒྲུབ་པ་མཛད། ཉམས་རྟོགས་ཀྱི་ཡོན་ཏན་ཐུགས་ལ་འཁྲུངས། བླ་མར་སངས་རྒྱས་སུ་ངེས་ཤེས་སྐྱེས། ཅི་བྱས་ཐམས་ཅད་བླ་མའི་བཀའ་བཞིན་སྒྲུབ་པའི་དམ་བཅའ་བརྟན་པོར་བཞུགས་པ་ལ། བླ་མའི་བཀའ་ཡིས་རང་ཡུལ་དུ་ལོག་ལ་དགོན་པ་ཞིག་ཐོབ་ཞེས་བསྐུལ་བ་ན། ཐོག་མར་རང་ཚང་གི་ར་བའི་ནང་དུ་གཙུག་ལག་ཁང་དོད་ཙམ་ཞིག་བཞེངས་ཏེ་དེས་ཆོག་གམ་ཞུས་པས། བླ་མས་མི་ཆོག་གསུངས། འོ་ན་སྔར་དཀར་ཕྱོགས་ལེན་སའི་ལྷ་ཁང་དེ་དགོན་པར་བསྒྱུར་ན་ཆོག་གམ་ཞུས་པས། དེས་ཆོག་རྒྱུ་བྱེད། དགོན་པ་དེའི་མཚན་ལ་ངེས་དོན་ཆོས་འཁོར་གླིང་ཐོགས་གསུངས། ཆོས་ལུགས་གང་ཞིག་བྱེད་ཞུས་པས། ཆོས་ལུགས་ནི་དཔལ་ཀརྨ་པ་ཐེགས་མཆོག་རྡོ་རྗེའི་བཀའ་ཇི་ཕེབས་བཞིན་གྱིས་གསུངས་པ་ལྟར་མཚུར་མདོ་བོ་ལུང་དུ་ཁྱད་དུ་བྱོན་ནས་བཀའ་བསྐོར་ཞུས་པའི་ཚེ། དཔལ་རྒྱལ་བའི་དབང་པོའི་ཞལ་སྔ་ནས། དགོན་པ་དེ་བྱམས་མགོན་སི་ཏུ་རིན་པོ་ཆེའི་ཐུགས་བཞེད་ལྟར་བཏབ་པ་ཞིག་ལགས་པས་ཆོས་ལུགས་དེ་ཀཾ་ཚང་ལྟར་བྱེད་དགོས་དགོས་འདྲ་ཡང་། དེ་སྐོར་དུ་འབའ་རོམ་གྱི་དགོན་པ་མང་དག་ཅིག་མཆིས་པས་ཁྱོད་ཀྱང་ཆོས་རྒྱུད་འབའ་རོམ་ལྟར་གྱིས། དགོན་པ་དེ་ལ། གསང་ཆེན་ཆོས་གླིང་ཞེས་ཐོགས་གསུངས་པས། རྒྱལ་བ་ཡབ་སྲས་ཟུང་ནས་དགོངས་པ་གཅིག་མཐུན་གྱིས་གནང་བའི་དགོན་མིང་ལ་ཆོས་གླིང་དགོན་ཞེས་སུ་ཆགས་ལ། ཆོས་ལུགས་ཀྱང་རྒྱལ་དབང་ཐེག་མཆོག་རྡོ་རྗེའི་བཀའ་བཞིན་མཉམ་མེད་འབའ་རོམ་པའི་བཀའ་སྲོལ་འཛིན་པ་ཞིག །གནས་ཡུལ། ཁམས་ནང་ཆེན་ལྕི་རྒྱུད་ཚང་གསར་གྲྭ་ནང་།
