མཛོ་རྫི་དགོན། __
དཔལ་ལྡན་མཛོ་རྫི་དགོན་ཕུན་ཚོགས་རབ་བརྟན་ཆོས་འཁོར་གླིང་ནི། དུས་རབས་བཅུ་བཞིའི་སྨད་ཙམ་དུ་ཡོན་ལྕོག་སྤོས་གསུམ་ཞེས་པའི་གྲུབ་བརྙེས་སྐྱེས་བུ་གསུམ་གྱིས་ཁམས་ལྷ་ཐོག་གི་སའི་ཆར་ཕྱག་བཏབ་ཅིང་གདན་ས་བསྐྱངས། ཡོན་དགེ་བླ་རབས་དགུ་པའི་དུས་སུ་ཁོང་གི་སྐུ་ཚ་ཡོན་དགེ་གཏེར་ཆེན་མི་འགྱུར་རྡོ་རྗེ་དགུང་ལོ་དྲུག་གི་ཐོག་མཛོ་རྫི་ལ་ཕེབས་པ་ནས་མཐར་གྲུབ་སྤྱོད་ལ་མ་ཕེབས་བར་དུ་སྒྲུབ་གནས་མཛད་ཅིང་ཡོན་དགེའི་གྲོ་ལོད་དང་ཀརྨ་པཀྵིའི་བླ་སྒྲུབ་སོགས་ཟབ་གཏེར་མང་པོ་བཞེས། ཕྱིས་སྤྱི་ལོ་༡༧༦༥ ལོར་ཀན་ཏིང་ཏཱ་ཡི་སི་ཏུ་ཆོས་ཀྱི་འབྱུང་གནས་ཀྱིས་སྔར་གྱི་དགོན་པའི་ཕྱི་གཙུག་ལག ནང་རྟེན་གསུམ། གསང་བ་དགེ་འདུན་གྱི་སྡེ་དང་བཅས་པ་དཔལ་སྤུངས་གཉིས་པ་ལྟ་བུར་རྒྱ་བསྐྱེད་གནང་ཞིང་རྗེ་ཉིད་ཀྱི་དངོས་སློབ་ལྷ་ཐོག་རྒྱལ་སྲས་ཀརྨ་ཕུན་ཚོགས་བསྟན་པ་རབ་རྒྱས་དེ་ཉིད་མཐིང་དམར་ཅོད་པན་འཆང་བ་ཟུང་དང་ཏཱ་ཡི་སི་ཏུ་ཉིད་བཅས་ཡབ་སྲས་རྣམས་ཀྱིས་དགོངས་མགྲིན་གཅིག་པར་ཆོས་རྗེ་ཀརྨ་འཕྲིན་ལས་པའི་རྣམ་རོལ་དུ་ངོས་འཛིན་གནང་ཞིང་གདན་ས་འདིའི་བདག་པོར་མངའ་གསོལ། ལྷ་ཐོག་པ་ཡོངས་ཀྱི་སྐྱབས་མགོན་དུ་གཟེངས་བསྟོད། དམ་པ་འདི་ལྷ་ཐོག་རྒྱལ་སྲས་ཡིན་རྐྱེན་ཡོངས་གྲགས་ཀྱི་མཚན་ལ་རྗེ་དྲུང་ཞེས་ཞུ། དེ་ནས་བཟུང་ལྷ་ཐོག་རྒྱལ་རིང་རེར་རྒྱལ་སྲས་རེ་དང་བློན་ཇས་རིགས་མངའ་འབངས་བརྒྱ་ཤོག་ཕྱེད་དྲུག་ཡོངས་ཀྱིས་གྲྭ་ཁྲལ་ཆད་མེད་འཇོག་སྲོལ་ཡོད། རྒྱུན་པར་འདུས་པ་ཞལ་གྲངས་སུམ་བརྒྱ་ནས་ལྔ་བརྒྱའི་བར་བྱུང་། འཁོར་ལོ་གསུམ་གྱིས་རྒྱལ་བསྟན་ཚུལ་བཞིན་བསྐྱངས། གདན་ས་འདི་ག་རང་ལ་དེང་གི་བར་རྗེ་དྲུང་པའི་མཚན་ཅན་ལྔ་ཕེབས་པའི་གཉིས་པ་ཀརྨ་ཆོས་རྒྱལ་ཕུན་ཚོགས་ལ་ཀརྨ་པ་ཐེག་མཆོག་རྡོ་རྗེས་འཕྲིན་ལས་དོན་ཡོད་གྲུབ་པའི་ཁ་དོག་ཅན་གྱི་ཅོད་པན་བསྩལ་ཞིང་ཁོང་གི་རྒྱལ་ཚབ་ཏུ་མངའ་གསོལ། རིག་གསར་རྗེས་༧རྗེ་དྲུང་རིན་པོ་ཆེ་དང་བླ་སྤྲུལ་མཁན་པོ་རྣམས་ཀྱིས་ལུང་རྟོགས་ཀྱི་བསྟན་པ་རིན་པོ་ཆེའི་འཆད་ཉན་ཉམས་བཞེས་ཀྱི་སྡེ་བཤད་གྲྭ་དང་། ནཱ་རོ་དང་ནཱི་གུའི་སྒྲུབ་སྡེ། ཚོགས་ཆེན་རྒྱུད་གྲྭ། བཙུན་དགོན། རི་ཁྲོད་ཁག་བཅས་བསྐྱར་བསྐྲུན་བགྱིས་ཤིང་གཙོ་བོ་སྒྲུབ་བརྒྱུད་ཀརྨ་ཀཾ་ཚང་པའི་བཀའ་སྲོལ་འཛིན་པའི་ཆོས་སྡེ་སྟེ་བར་ཁམས་ཕྱོགས་ནས་གཞི་རྒྱ་ཆེ་ཤོས་ཀྱི་དགོན་སྡེ་ཞིག་གོ།
གངས་དཀར་ནས།
