འདམ་གཞུང་རྡོ་རྗེ་གླིང་བཙུན་དགོན།
བསམ་གཏན་དགའ་ཚལ་གླིང་ངམ་རྡོ་རྗེ་གླིང་དགོན་པ་ནི། དཔལ་རྒྱལ་བ་ཀརྨ་པ་དུས་གསུམ་མཁྱེན་པ་གནས་ངེས་མེད་ལ་སྒྲུབ་པ་མཛད་པའི་སྐབས་སུ་སྤྱི་ལོ་1150ཡས་མས་གནས་འདིར་ཕེབས་ནས་སྒྲུབ་པ་མཛད། དེ་ནས་བཟུང་སྒྲུབ་པ་པོ་བར་མ་ཆད་པ་བྱུང་། དེ་རྗེས་རྒྱལ་བ་ཀརྨ་པ་མཁའ་ཁྱབ་རྡོ་རྗེས་དགོན་པ་རྒྱ་སྐྱེད་གནང་བསམ་གཏན་དགའ་ཚལ་གླིང་ཞེས་མིང་འདོགས་གནང་མཛད། འཇང་གི་རྒྱ་གླིང་གིས་གཙོས་པའི་མཆོད་ཆ་དང་རྟེན་གསུམ་བྱིན་ཅན་དུ་མ་བསྩལ་གནང་ནས་ཀར་ལུགས་རྩ་གསུམ་སྒྲུབ་མཆོད་མང་པོ་གསར་འཛུགས་མཛད། བཙུན་མ་བཅུ་ཕྲག་མང་པོས་སྒྲུབ་པ་གཙོ་བོར་མཛད། རིག་གསར་གྱི་རྗེས་སུ་1984ལོར་སྐྱབས་རྗེ་སྒྲུབ་དཔོན་བདེ་ཆེན་རིན་པོ་ཆེ་གྱང་རོལ་གྱི་ཁྲོད་དུ་དངོས་སུ་ཕེབས་ནས་ས་གཞི་བྱིན་རླབས། བསང་དང་གསེར་སྐྱེམས་ཚོགས་ཀྱི་འཁོར་ལོ་བསྐོར་བ་སོགས་མཛད་ནས་བསྐྱར་བཞེངས་དབུ་འཛུགས་གནང་། སྦྱིན་བདག་ལྷག་བསམ་ཅན་དང་དད་ལྡན་མང་ཚོགས། རིམ་ཁག་སྲིད་གཞུང་གི་རྒྱབ་སྐྱོར་བཅས་ཀྱིས་ད་ལྟའི་ཆར་དགོན་པའི་ཕྱི་ནང་གསང་གསུམ་ལེགས་པར་གྲུབ་ནས་གདན་ས་མཚུར་ཕུའི་གཟིགས་སྐྱོང་གི་འོག་ལ་བཙུན་མ་བདུན་ཅུ་ཙམ་གྱིས་བཤད་གྲྭ་སྒྲུབ་གྲྭ་ཚོགས་གཞུང་བཅས་ཀྱིས་བསླབ་པ་སློབ་གཉེར། ཚོགས་སྒྲུབ་མཆོད་སོགས་ཆོས་ཕྱོགས་ཀྱི་བྱ་བ་ལ་འབད་འབུང་བྱེད་བཞིན་མཆིས། ས་གནས་ལྷ་ས་འདམ་གཞུང་རྫོང་རྒྱས་དར་གཡང་ར། ལམ་ཐག ལྷ་ས་ནས་སྤྱི་ལེ་140 མཚོ་འཕགས་རྨིད།4500བཅས་ཡོད།
