གདན་ས་སྟག་སྣ་དགོན་ནམ་མཚན་གཞན་«སྟག་སྣ་བཤད་སྒྲུབ་ཆོས་འཁོར་གླིང་»ནི་བོད་ལྗོངས་རྣམ་གླིང་རྫོང་སྟག་སྣ་ཤང་སྟག་སྣ་གྲོང་ཚོའི་ཤར་ངོས་སུ་ཆགས་ཡོད་ཅིང་། རྣམ་གླིང་རྫོང་ནས་བྱང་ཕྱོགས་སུ་སྤྱི་ལེ་༡༧ཙམ་བསྐྱོད་ན་གཞི་ནས་གནས་དེར་སླེབས། དེར་རྒྱ་མཚོའི་ངོས་ནས་མཐོ་ཚད་རྨིད་༤༡༠༠ལྷག་ཙམ་ཡོད། དགོན་དེ་ནི་རི་བོ་སྟག་གི་སྣ་དབྱིབས་འདྲ་བའི་སྟེང་དུ་ཕྱག་བཏབ་པས་མཚན་ལ་ཡང་སྟག་སྣ་དགོན་ཞེས་ཐོགས། གདན་ས་འདི་ནི་ཀཾ་ཚང་ཡབ་སྲས་བདུན་གྱི་ནང་ཚན་ཏྲེ་ཧོ་སྐུ་ཕྲེང་རིམ་བྱོན་གྱིས་མཛད་པ་ཕྲིན་ལས་བསྐྱངས་དང་སྐྱོང་གནང་སའི་གཙོ་བོའི་གནས་ཤིག་ཡིན་ཅིང་། དེ་ནི་ཐོག་མར་སྤྱི་ལོའི་དུས་རབས་བཅུ་དྲུག་པའི་ནང་དུ་༧ཏྲེ་ཧོ་རིན་པོ་ཆེས་ཕྱག་བཏབ་པའི་སྒྲུབ་བརྒྱུད་ཀརྨ་ཀཾ་ཚང་གི་གཙོ་བོའི་དགོན་སྡེའི་གྲས་ཤིག་ཡིན་པ་ནི་སྨོས་མེད་ཡིན། ད་བར་དུ་ཁྱོན་ལོ་ངོ་༥༠༠ཙམ་གྱི་ལོ་རྒྱུས་ལྡན་ཡོད་པར་སྣང་། རིག་གསར་གྱི་གོད་ཆག་ཁྲོད་ནས་སླར་ཡང་༧ཏྲེ་ཧོ་རིན་པོ་ཆེ་སྐུ་ཕྲེང་བཅུ་པ་ཆེན་པོས་ཕྱི་ལོ་༡༩༨༥ལོར་སྟག་སྣ་སྒྲོལ་མ་ལྷ་ཁང་ངམ་གཙུག་ལག་ཁང་འོག་མ་ཉམས་གསོ་གནང་བ་དང་། ཕྱི་ལོ་༡༩༩༡ལོར་ད་ལྟའི་གཙུག་ལག་ཁང་གོང་མ་རྟེན་དང་བརྟེན་པར་བཅས་པ་ཉམས་གསོ་དང་གསར་བཞེངས་གནང་བའི་བླ་ན་མེད་པའི་ཐུགས་རྗེའི་བདག་རྐྱེན་འོག་ད་ལྟ་སྔགས་ཕྱོགས་ནས་གསར་རྙིང་གི་རྒྱུད་སྡེ་ཁག་གི་མཐོང་བ་བརྒྱུད་པའི་ཕྱག་བཞེས་མ་ཉམས་པར་སྐྱོང་བཞིན་ཡོད་ལ། མདོ་ཕྱོགས་ནས་གསར་བུ་བ་རྣམས་ཀྱིས་དྭགས་པོའི་ལམ་རིམ་ཐར་རྒྱན་དང་བསྡུས་གྲྭ། གྲུབ་དོན་ས་གསུམ། དེ་བཞིན་བོད་ཀྱི་ཐ་སྙད་རིག་གནས་ཁག་ལ་ཐོས་བསམ་སློབ་གཉེར་གནང་བཞིན་མཆིས།
