བཀའ་བརྒྱུད་པའི་དགོན་སྡེ་གསར་རྙིང་གི་བརྙན་པར་ཕྱོགས་བསྡུས།

རང་ཚུགས་ནས།

དྭགས་ལྷ་སྒམ་པོ།

མཚན་རྒྱས་པར་གདན་ས་ཆེན་པོ་དྭགས་ལྷ་སྒམ་པོ་ཞེས་ཞུ། དྭགས་པོ་ཞེས་པ་ནི་སྔོན་བོད་མིའི་རིགས་རུས་ཤིག་ཡིན་པ་དང་། དྭགས་ལྷ་སྒམ་པོ་ནི་སྲིད་པ་ཆགས་པའི་ལྷ་དགུའི་གྲས་ཡིན་པས་ལྷ་མིང་ཡུལ་ལ་ཆགས་པར་གྲགས། རྒྱ་ཚྭ་རྫོང་ནས་དཔྱང་ཟམ་ཕར་ཐོན་ཏེ་ཡར་ཀླུངས་གཙང་པོའི་བྱང་ངོས་ཀྱི་འཁོར་ལམ་སྤྱིར་བཏང་བ་བརྒྱུད་ཆོས་འཁོར་རྒྱལ་དུ་འགྲོ་སའི་ལམ་དང་། རྭ་སྒྲེང་འཁྲུངས་ཁང་སོགས་བརྒྱུད་སྤྱི་ལེ་བཞི་བཅུ་ལྷག་ཙམ་སོང་ན་གཅེས་ཞེས་པའི་གྲོང་དེར་འབྱོར། དེ་ནས་འཁོར་ལམ་མེད་ལ་རྐང་ཐང་མར་ཆུ་ཚོད་གསུམ་མ་ཟིན་ཙམ་འཛེགས་ན་དགོན་དེར་སླེབས། དགོན་དེ་ནི་མར་མི་དྭགས་གསུམ་གྱི་ཡ་གྱལ་མཉམ་མེད་དྭགས་པོ་ལྷ་རྗེས་སྤྱི་ལོ་༡༡༢༡ལ་ཕྱག་འདེབས་གནང་མཛད། གནས་དེ་ནི་རྒྱལ་བའི་ལུང་གིས་ཟིན་པའི་རི་བོ་ཤཀྟིར་རམ་རི་བྲག་ཚང་ཚིང་ཅན་གྱི་གནས་ལ་ངོས་བཟུང་། ངོ་མཚར་ཆེ་བའི་རྒྱབ་རི་ནས་སྐྱེས་བུ་དམ་པ་སོ་སོར་གཟིགས་སྣང་མི་འདྲ་བ་མང་པོ་བྱུང་བར་གྲགས། མཉམ་མེད་དྭགས་པོ་ལྷ་རྗེའམ་ཟླ་འོད་གཞོན་ནུ་ནི་སྤྱི་ལོ་༡༠༧༩ལོར་གཉལ་བོད་རྙིང་གྲོང་གསར་ཞེས་པར་སྐུ་འཁྲུངས་ཚུལ་དང་། བཙུན་མོ་སྲས་སྲོས་དང་བཅས་པ་རིམ་བཞིན་གཤེགས་ཚུལ་འཁོར་བ་ལ་ངེས་པ་འབྱུང་ནས་རབ་ཏུ་བྱུང་ཚུལ་སོགས་དེབ་འདིའི་ལྷུན་རྩེ་རྫོང་ཁོངས་མཁར་སྟེང་དགོན་གྱི་གནས་བཤད་ཀྱི་ཞར་དུ་ཞིབ་པར་གསལ། དྭགས་པོ་ལྷ་རྗེ་དགུང་ལོ་སོ་གཉིས་ལ་སྟོད་དུ་ཕེབས་ནས་རྗེ་བཙུན་མི་ལའི་ཞབས་ལ་གཏུགས། གདམས་ངག་གསན་ཏེ་ཉམས་མྱོང་གི་རྩལ་ཐོན། དབུས་སུ་ཕེབས་ཁར་རྗེ་བཙུན་མི་ལས་བུ་སྟོན་པ་དབུས་སུ་བཞུད་པ་ན།། ཤར་སྒམ་པོ་དར་གྱི་རི་བོ་དེ།། རྒྱལ་པོ་གདན་ལ་བཞུགས་པ་འདྲ།། རྒྱབ་རི་དར་དཀར་ཡོལ་བ་འདྲ།། རི་བདུན་བློན་པོ་འདུད་པ་འདྲ།། ཤིང་སྤང་གསེར་གྱི་མཎྜལ་འདྲ།། རི་དེ་ཡི་མགུལ་ན་གདུལ་བྱ་ཡོད།། ཁྱོད་དེ་རུ་སོང་ལ་འགྲོ་དོན་སྒྲུབས།། བུ་ཁྱོད་ཀྱི་བཞེད་དོན་འགྲུབ་ནས་མཆིས།། ཞེས་གསུངས་པ་ལྟར་དྭགས་ལྷ་སྒམ་པོ་ཕྱག་བཏབ། བཀའ་གདམས་པའི་ལམ་རིམ་དང་། རྗེ་མི་ལའི་བཀའ་ཕྱག་རྒྱ་ཆེན་པོའི་གདམས་པ་གཅིག་ཏུ་དྲིལ་ནས་ལམ་རིམ་ཐར་རྒྱན་མཛད། ལོ་གསུམ་སྟན་དང་མ་བྲལ་བར་སྒོམ་པའི་བརྩོན་འགྲུས་བསྐྱེད་པས་བཟོད་སེམས་ཀྱི་ངོ་བོ་མཐོང་། ཆོས་ཐམས་ཅད་ཀྱི་དེ་ཁོ་ན་ཉིད་མཁྱེན། སློབ་མ་མཐའ་ཡས་པ་བྱུང་ནས་དྭགས་པོ་བཀའ་བརྒྱུད་པའི་སྲོལ་གཏོད། སྔོན་དགོན་དེར་གཙུག་ལག་ཁང་ཀ་ཆེན་བཞི་བཅུ་དང་། ཀ་ཡུལ་ལྔ་བཅུ་རྩ་བཞི། ཟངས་ལུང་སྤྲུལ་པའི་ཕོ་བྲང་། གསང་སྔགས་ཕོ་བྲང་། ཆོས་ཁང་རྩེ་སོགས་སོ་སོར་དྭགས་པོ་ལྷ་རྗེའི་ཐུགས་དག་གྱི་རྟེན་རྗེ་མི་ལའི་སྐུ་དང་། དྭགས་པོ་ལྷ་རྗེའི་སྐུ་གསུང་འབྱོན་མ། ཇོ་བོ་རྗེའི་ཕྱག་བཟོ་ཐུགས་རྗེ་ཆེན་པོ་གཙོ་འཁོར། མངའ་བདག་ཁྲི་རལ་གྱིས་བཞེངས་པའི་སྤྱན་རས་གཟིགས་ཁ་སར་པ་ཎི། ཀླུ་སྒྲུབ་ཀྱི་ཕྱག་བྲིས་གྲུབ་ཆེན་མང་པོའི་ཕྱག་བརྒྱུད་པ་ན་རོ་པའི་ཐུགས་དམ་གི་རྟེན་བདེ་མཆོག་གི་སྐུ་ཐང་། མར་པའི་ཕྱག་བྲིས་ན་རོ་པའི་སྐུ་ཐང་། བེེཌཱུརྻའི་གླེགས་བམ་ཉི་ཁྲི་སོགས་ནང་རྟེན་ཁྱད་དུ་འཕགས་པ་མང་པོ་བཞུགས།

ད་ལྟ་གསར་བཞེངས་གནང་བའི་འདུ་ཁང་ནང་གསེར་ཟངས་ཀྱི་དྭགས་པོ་ལྷ་རྗེའི་སྐུ་བརྙན་ཐོག་ཚད་མའི་ཐུགས་ཀར་གུ་རུའི་རིང་བསྲེལ་དང་། རྗེ་ཉིད་ཀྱི་དབུ་ཀླད་རིང་བསྲེལ། ཐུགས་ལྗགས་འཁྲུལ་བྲལ། སངས་རྒྱས་བྱང་སེམས་མང་པོའི་རིང་བསྲེལ་བཞུགས་པ་བྱིན་ཅན། གཞན་ཡང་གསར་བཞེངས་གནང་བའི་སྐུ་བརྙན་མང་པོ་མཇལ་རྒྱུ་ཡོད།

ཡེ་ཤེས་བྱང་ཆུབ་ནས།

རྡོ་རྗེ་ཕ་ལམ་ནས།

དུས་ཀྱི་བྱ་སྐད་ནས།

གནས་འདི་རྒྱལ་བ་རྒོད་ཚང་པའི་སྟེང་འགྲོ་དགོན་པ་རེད། དེང་དུས་གཞི་རྩེ་དིང་རི་རྫོང་ཁོངས་སུ་ཡོད།

ཀརྨ་སྙིང་གཟུགས་ནས།

གནས་འདི་ནི་ཆོས་རྗེ་རྒོད་ཚང་མགོན་པོ་རྡོ་རྗེ་བཞུགས་གནང་ས་གཙང་ལ་སྟོད་རྒྱལ་གྱི་ཤྲི་རྒོད་ཚང་དགོན་རེད། དེང་དུས་བོད་ལྗོངས་གཞི་རྩེ་གྲོང་ཁྱེར་དིང་རི་རྫོང་ཁོངས་སུ་ཡོད།

ཆོས་རྗེ་རྒོད་ཚང་པ་མགོན་པོ་རྡོ་རྗེ་ངོ་སྤྲོད་མདོར་བསྡུས།

རྗེ་འདི་ཉིད་ཡབ་ཆུ་ཆལ་མོན་གྲགས་དང་ཡུམ་ཟུག་མོ་དཔལ་རྒྱན་གཉིས་ཀྱི་སྲས་སུ་རབ་བྱུང་གསུམ་པའི་ས་བྱ་（སྤྱི་ལོ）ལོར་ལྷོ་བྲག་དུ་ལུ་ཆུང་གི་ཁྲར་སྐུ་བལྟམས།   གཅེན་པོ་གཉིས་སྔ་བར་གྲོངས་པ་ལ་བརྟེན་སྲེའུ་གསོ་བའི་སློབ་དཔོན་ཟུག་སྟོན་བྱ་བ་ལ་གཏད།   མཚན་མགོན་པོ་དཔལ་དུ་གསོལ།   སྐུ་ཆུང་དུས་ནས་མཇལ་སྤྲོ་ལ།  ཐུགས་བཟང་བ།  བྲོ་བའི་བ་ཤི་མཛད་པས་བ་ཤི་དོན་གྲུབ་སེང་གེར་གྲགས།   དེ་ནས་སློབ་དཔོན་ཝ་ཞྭ་ལས་ལམ་རིམ།    སློབ་དཔོན་སྟོད་ལས་དབུ་མ།   སློབ་དཔོན་ཡུ་པི་བ་ལས་སྤྱོད་འཇུག།   སློབ་དཔོན་ཞང་ལས་འགྲེལ་ཆུང་བཅས་གསན་ཏེ་ཕལ་ཆེར་ཚར་རེས་མཁྱེན་པ་བྱུང་།   དགུང་ལོ་བཅུ་དགུ་པ་ལ་ར་ལུང་དགོན་དུ་ཕེབས་ཏེ་ཆོས་རྗེ་རྒྱ་རས་པ་བཤེས་གཉེན་དུ་བསྟེན་ནས་རབ་དུ་བྱུང་།   མཚན་མགོན་པོ་རྡོ་རྗེར་གསོལ།   རྗེ་བླ་མས་སྐྱབས་འགྲོ་སེམས་བསྐྱེད།    སེམས་བསྐྱེད་ཆེན་མོ།    རྣལ་འབྱོར་བཞི།   ལྷན་གཅིག་སྐྱེས་སྦྱོར།   ཐབས་ལམ་གྱི་ཁྲོད།   རོ་སྙོམས་ཀྱི་དམིགས་པ་མང་བ།   རབས་བདུན།  ཆིག་ཆིག་སོགས་དང་།  རྩ་ལྟུང་བཅུ་བཞི་པ་ལ་སོགས་དམ་ཚིག་གི་ཆོས་སྐོར།   སྒྲུབ་ཐབས་བཅུ་གསུམ་མ་དང་ཞལ་གཉིས་མ་ལ་སོགས་པ་ཐམས་ཅད་ཀྱི་ལུང་གསན།   དེ་ནས་འབྲུག་དང་།    འབྲི་གུང་།  རྭ་སྒྲེང་བཅས་ལ་བྱོན་ནས་ཆོས་མང་དུ་འཆད་ཉན་མཛད་དེ་སླར་ཆོས་རྗེ་རྒྱ་རས་པའི་དྲུང་དུ་ཕྱིར་ཕེབས།   དགུང་ལོ་ཉི་ཤུ་རྩ་གསུམ་པ་ལ་ལྷོ་བྲག་མཁར་ཆུར་བྱོན་ཏེ་ལོ་གསུམ་བཞུགས།   དགུང་ལོ་ཉི་ཤུ་རྩ་དགུ་ལ་ཕོ་མ་ལྷ་ཁབ་ཏུ་བྱོན་ནས་སྤྱིལ་པོ་ཞིག་ཏུ་ལོ་གསུམ་དུ་བླ་མ་སྒྲུབ་པ་མཛད།   དེ་ནས་དབོན་རས་ཀྱི་དྲུང་དུ་བྱོན་ནས་བསྙེན་པར་རྫོགས།  དགུང་ལོ་སོ་གཉིས་པ་ལ་ཙ་རི་ལ་བྱོན་ནས་ལོ་གསུམ་བཞུགས།  དགུང་ལོ་སོ་དྲུག་ལ་ཁྱུང་དཀར་དང་ཡང་དཀར་གཉིས་སུ་ལོ་གསུམ་བཞུགས་པས་ཐུགས་དམ་ཤིན་ཏུ་འཕེལ།  དགུང་ལོ་སོ་བརྒྱད་ཐོག་རྒོད་ཚང་དུ་ཕེབས་ཏེ་མཚམས་ཀྱི་དམ་བཅའ་དྲག་པོ་མཛད་ནས་ལོ་བདུན་བཞུགས།  སྟེང་འོག་གི་གདོན་ཐམས་ཅད་རྒོད་ཚང་དུ་འདུས་ནས་ཆོས་ཉན་པ་མཐོང་བས།    སྔར་གཞན་དོན་མི་མཛད་པར་སྙམ་པའི་བློ་ཡོད་པ་དེར་ལོག།    དེ་ནས་རྒོད་ནས་བྱོན་ཏེ་ལས་སྟོད་ཀྱི་རི་སུལ་རྣམས་སུ་ཕེབས་ཏེ་གསང་སྤྱོད་མཛད།    སྐུ་ཚེའི་སྨད་དུ་སྟེང་གྲོ་དང་།   བདེ་ཆེན་སྟེངས།  སྤུན་དྲ།  བྱང་གླིང་།   བར་འབྲོག།   རྡོ་རྗེ་གླིང་སོགས་དགོན་པ་མང་པོ་ཕྱག་བཏབ།  དགོན་པ་རེ་རེ་ནས་ཀྱང་དགེ་འདུན་སྒྲུབ་པ་པོ་སྟོང་ཚོ་མང་པོ་ཐོན་པ་བྱུང་།   མཐར་དགུང་ལོ་བདུན་ཅུ་ཕེབས་པ་རབ་བྱུང་བཞི་པའི་ས་རྟ（སྤྱི་ལོ1258）ལོར་དགོངས་པ་མྱ་ངན་ལས་འདས།   འདི་ཉིད་ལ་སློབ་མ་མང་དུ་བྱུང་བ་ལས་ཐུགས་ཀྱི་སྲས་ཀྱང་ཡང་དགོན་པ།   གྲུབ་ཆེན་ཨུ་རྒྱན་པ།  བྱང་གླིང་པ།  ཆོས་རྗེ་ནེ་རིངས་པ།   ཕུ་རི་བ།    མཉམ་མེད་པ་རི་སྦྱིལ་དཀར་བ།   རྗེ་མ་བདུན་པ།   ཞི་བྱེད་མགོན་པོ།   སངས་རྒྱས་ཁྲོམ་རས།   དཔལ་སྐྱེར་ཤིང་རས་པ།    ཤཱཀྱ་རས་པ།  འདར་རས་ལ་སོགས་པ་མང་དུ་བྱོན་ནོ།

ཀརྨ་སྙིང་གཟུགས་ནས།

ལྷ་ཐོག་ཆོས་རྒྱལ་རིམ་བྱོན་གྱི་རྩ་བའི་གདན་ས་ཁམས་ལྷ་ཐོག་དགོན་པའི་ལོ་རྒྱུས་མདོར་བསྡུས།

ཁམས་ལྷ་ཐོག་དགོན་པ་ནི། ལྷ་ཐོག་རྒྱལ་རབས་ཉེར་བཞི་པ་ཆོས་རྒྱལ་མགོན་པོ་བསམ་འགྲུབ་ཀྱིས་སྦྱིན་བདག་ཞུས་ཏེ། སྤྱི་ལོ་༡༥༧༣ལོར་༧རྒྱལ་དབང་ཀརྨ་པ་སྐུ་ཕྲེང་དགུ་པ་དབང་ཕྱུག་རྡོ་རྗེ་མཆོག་གིས་ལྷ་ཐོག་གི་རྒྱལ་ས་མཐིལ་དུ་ཕྱག་བཏབ། ཐོག་མར་དགེ་འདུན་གྱི་སྡེ་གནས་བརྟན་བཅུ་དྲུག་གི་གྲངས་དང་ལྡན་པ་ཞིག་བཙུགས། རྒྱལ་དབང་མཆོག་གི་སྐུ་ཚབ་ཏུ་འདྲ་སྐུ་གསུང་བྱོན་མ་དང་མགོན་སྐུ་མེ་འབར་མ་སོགས་གནང་བ་ད་ལྟ་ཡང་རྟེན་གྱི་གཙོ་བོ་རུ་བཞུགས་ཡོད། གདན་ས་བར་པ་འོག་མིན་ཀརྨའི་ལུགས་ལྟར་མགོན་པོ་དང་ཚེ་སྒྲུབ་སོགས་ཀྱི་སྒྲུབ་པའི་རྒྱུན་བཙུགས། རྒྱལ་པོའི་ཕོ་བྲང་གི་གཡས་ཕྱོགས་སུ་གཙུག་ལག་ཁང་དམར་འགྱ་མ་བཞེངས་པས། དེ་ནས་བཟུང་རྫོང་དགོན་ཁ་སྤྲོད་ཟེར་བ་དེ་བྱུང་བར་གྲགས། རྒྱལ་རབས་རིམ་བྱོན་གྱིས་སྦྱིན་བདག་དང་གཙོ་འགན་བཞེས་ཏེ་དར་རྒྱས་སུ་སོང་བས་མི་ངོ་ལྔ་བརྒྱ་ལ་ཉེ་བའི་ལོ་རྒྱུས་ལྡན་ཞིང་སྲིད་ན་དཀོན་པའི་ལྷ་སྐུ་རྟེན་གསུམ་གྱིས་ཕྱུར་བུར་གཏམས། ད་སྐབས་དགོན་པ་འདི་ཉིད་ལྗོངས་རིམ་པའི་རྩ་ཆེའི་རིག་དངོས་སྲུང་སྐྱོབས་སྡེ་ཚན་དུ་ཚུད་ཡོད། ལྷ་ཐོག་རྒྱལ་པོ་ཀརྨ་དོན་གྲུབ་དཔལ་ལྡན་དང་རྒྱལ་སྲས་ཀར་ཚེ་སོགས་དམ་པ་མང་པོས་པར་ཤིང་ཁྲི་ཚོ་དུ་མ་ཡོད་པའི་ལྷ་ཐོག་པར་ཁང་ཆེན་མོ་དང་། མདོ་སྔགས་རིག་གནས་དང་བཅས་པའི་པོད་ཆེན་ཁྲི་ལ་ཉེ་བའི་ལྷ་ཐོག་དཔེ་མཛོད་ཁང་ཆེན་མོ་གཙོས་པའི་རྟེན་གསུམ་མང་པོ་བཞེངས་པར་མཛད་པ་མ་ཟད། གསར་རྙིང་གི་སྒྲུབ་མཆོད་མང་པོའི་རྒྱུན་བཙུགས་པ་དང་།དགོན་རི་ཁྲོད་དུ་མ་ཉམས་གསོ་དང་གསར་འདེབས་མཛད་ནས་དེ་དག་ལ་བླ་བསྐོས་མངགས་ཏེ་བདག་སྐྱོང་གནང་བ་དང་། རྒྱལ་བ་ཡབ་སྲས་གཙོས་པའི་རིས་མེད་ཀྱི་སྐྱེས་ཆེན་དུ་མ་གདན་འདྲེན་ཞུས་ཏེ་ཆོས་རིག་དར་སྤེལ་དང་། བསྟན་འགྲོ་ལ་ཕན་པའི་མཁས་གྲུབ་མང་པོ་གསོ་སྐྱོང་གནང་བར་མཛད་པ་སོགས་བསྟན་པ་ལ་མཛད་རྗེས་ཤིན་ཏུ་ཆེ། རིག་གསར་སྐབས་དགོན་སྡེ་སྤྱི་ལྟར་གཏོར་སྐྱོན་ཚབ་ཆེན་ཤོར། སླར་ཡང་སྤྱི་ལོ་༡༩༨༤ལོར་གྲུབ་ཆེན་ཚེ་དབང་དཔལ་ལྡན་རིན་པོ་ཆེས་ཉམས་གསོ་མཛད་ནས་བཤད་པ་དང་སྒྲུབ་པའི་སྡེ་བཙུགས་ཏེ་བསྟན་པའི་མེ་རོ་གསོས། ༧རྒྱལ་མཆོག་ཀརྨ་པ་བཅུ་བདུན་ཨོ་རྒྱན་ཕྲིན་ལས་རྡོ་རྗེ་མཆོག་དགུང་གྲངས་བཞིའི་ཐོག་དགོན་འདིར་ཆོས་ཞུགས་མཛད་ནས་ལོ་ངོ་བཞིའི་རིང་བཞུགས་ནས་གསན་སྦྱང་མཛད་ཅིང་། དགུང་གྲངས་བརྒྱད་ལ་ཕེབས་སྐབས་ཐོག་མར་དགོན་འདིའི་གསེར་ཁྲི་ལ་མངའ་གསོལ་ནས་ཁྲི་འདོན་གྱི་མཛད་སྒོ་ཕུན་སུམ་ཚོགས་པར་བྱས་ཏེ་རྒྱལ་དབང་མཆོག་གི་འཕྲིན་ལས་ཀྱི་སྒོ་འཕར་ཐོག་མར་ཕྱེས། ད་སྐབས་སྤྲུལ་སྐུ་ཀརྨ་གཞན་ཕན་གྱིས་འཛིན་སྐྱོང་གནང་ཏེ་ཡིག་གྲྭ་དང་།བཤད་གྲྭ། སྒྲུབ་གྲྭ། ཚོགས་གྲྭ་བཅས་ལས་གྲུབ་པའི་མཁན་སྤྲུལ་དགེ་འདུན་པ་བརྒྱ་ཕྲག་གཉིས་ཙམ་གྱིས་བཤད་སྒྲུབ་ལས་གསུམ་གྱི་སྒོ་ནས་རྒྱལ་བསྟན་རིན་པོ་ཆེ་འཛིན་སྐྱོང་སྤེལ་གསུམ་མཛད་བཞིན་པ་ལགས་སོ།

གངས་དཀར་ནས།