ཉང་རོ་གསེར་སྡིངས་དགོན། རྒྱང་རོ་གསེར་སྡིངས་པ་གཞོན་ནུ་འོད་ཀྱི་གདན་ས་ཉང་རོ་གསེར་སྡིངས་དགོན། དེང་དུས་གནས་ཡུལ། གཞིས་ཀ་རྩེ། ཁང་དམར་རྫོང་། གནས་རྙིང་དགོན་པ་དང་ཐག་ཉེར་མཆིས། རླང་རུ་གསེར་སྡིངས་ཟེར།
མར་ལུགས་གསང་བ་འདུས་པའི་བཀའ་སྲོལ་ལ་བཤད་སྒྲུབ་ཀྱི་མཛད་རྗེས་གནམ་འོག་ཏུ་འགྲན་ཟླ་བྲལ་བ། དུས་རབས་བཅུ་གཉིས་པའི་མཇུག་ཙམ་ལ་སུམ་པ་སྐྱིལ་མཁར་འཁྲུངས་པའི་མཁས་གྲུབ་ཆེན་པོ་ཞིག་ཡིན། གཞོན་དུས་ནས་འདུལ་དཀར་གཞོན་ནུ་ཚུལ་ཁྲིམས་ལས་རབ་ཏུ་བྱུང༌། ཇོ་བོ་རྗེ་ནས་བརྒྱུད་པའི་ལམ་རིམ་མན་ངག་དང་བཅས་པ་མང་དུ་གསན་ཞིང་ཐུགས་ཉམས་སུ་ཡང་བབས། ཕྱིས་སུ་མཁན་པོ་གཙང་ནག་པ་སོགས་ལས་བསྙེན་རྫོགས་ཀྱི་སྡོམ་པ་མནོས། འདུལ་བའི་སྐོར་ལ་སྦྱངས་པ་ཆེན་པོ་མཛད་དེ་འདུལ་འཛིན་ཆེན་པོར་གྱུར། རྗེ་སྒམ་པོ་པའི་དངོས་སློབ་ལོག་ཕུག་པ་ལས་ནཱ་རོ་ཆོས་དྲུག་དང༌། ཕྱག་རྒྱ་ཆེན་པོའི་ཁྲིད་ཞུས། ཤབ་ཀྱི་སྣ་རིངས་དང༌། མོན་གྱི་སྤ་གྲོ། བུམ་ཐང༌། གྲོ་བོ་ལུང༌། རྒྱལ་རྩིབས་རི་སོགས་གནས་ཆེན་མང་པོར་ཞབས་ཀྱིས་བཅགས། སེར་བུ་དབེན་ཚར་བཞུགས་ནས་གསེར་སྡིངས་དགོན་བཏབ། རྒྱས་འབྲིང་བསྡུས་གསུམ་ལས་མི་ཉུང་བའི་བསྟན་བཅོས་མང་དུ་མཛད། སློབ་མ་གྲགས་ཆེ་བ་ནི་མགར་གྲགས་པ་དབང་ཕྱུག་ཡིན།
