འཇོ་ཕུ་དགོན་ངེས་གསང་ཐར་པ་རྣམ་གྲོལ་གླིང་། དགོན་པ་འདི་ལྷ་རྩེ་བ་ངག་དབང་བཟང་པོའི་དངོས་སློབ་བླ་མ་ཀརྨ་ཕྲིན་ལས་པའམ། མཚན་གཞན་ཀརྨ་ཆོས་བློ་དང་། ཕྲིན་ལས་ཤེས་རབ། འབྲུག་པ་ཆོས་ལུ་སོགས་ཞུ། རྗེ་ཉིད་ཁམས་གྲུབ་དབང་ཀརྨ་བསྟན་འཕེལ་དང་ལྷན་དུ་ཁམས་སུ་ཕེབས། ཕྱི་ལོ་༡༦༠༣ལོར་བཀྲ་ཤིས་ལྷ་རྩེར་ཕྱག་བཏབ། དེའི་ཚེ་འདིར་རབ་ཏུ་བྱུང་ནས་རྟག་ཏུ་དབེན་པར་སྡོད་ཚུགས་དགོས་པའི་དགེ་འདུན་གྱི་ནང་ཁྲིམས་ལེགས་པས་རྣམ་དག་ཁྲིམས་གཙང་གི་ཚད་དུ་བྱེད་པའི་འདུས་སྡེ་ཞིག་བྱུང་།
འདིའི་སྐུ་ཕྲེང་གཉིས་པ་མི་ཕམ་དཔག་བསམ་རྣམ་རྒྱལ། མཚན་གཞན་ཆོས་བློ་འགྲོ་དོན་རྒྱ་མཚོ་ཟེར། འཇོ་ཕག་གྲུ་ཕུག་ཏུ་སྐུ་མཚམས་ལོ་མང་བཞུགས། རབ་བྱུང་བཅུ་གཅིག་པའི་ཆུ་ཡོས་ལོ་སྟེ། ཕྱི་ལོ་༡༦༦༣ལོར་སྒྲུབ་ཕུག་གི་ཉེ་འོག་ཏུ་གཙུག་ལག་ཁང་སོགས་གསར་བཞེངས་གནང་ནས་དེར་གདན་ས་མཛད་པས། དེ་ནས་དགོན་པའི་མཚན་ལ་འཇོ་ཕུ་དགོན་དུ་གྲགས། ཀརྨ་ཕྲིན་ལས་པའི་སྐུ་ཕྲེང་ན་རིམ་དང་། རྒྱའི་གྲུབ་ཐོབ་རྒྱ་ཆུ་འཕུར་ཡེ་ཤེས་རྡོ་རྗེ་དང་། རྣལ་འབྱོར་པ་བརྩོན་འགྲུས་བྱང་ཆུབ་བམ་འཇོ་རི་བྱང་ཆུབ་སྐུ་ཕྲེང་རིམ་བྱོན་བཅས་ཀྱིས་གདན་ས་བསྐྱངས་ནས་དཀྱིལ་འཁོར་སྒྲུབ་མཆོད་སོགས་མཉམ་མེད་འབྲུག་པའི་ཆོས་བརྒྱུད་ངོས་གཙང་ཞིག་འཛིན་ཐུབ་པ་བྱུང་ཡང་དུས་འགྱུར་སྐབས་རྩ་འཐོར་དུ་སོང་།
ད་ལྟར་བསྐྱར་གསོ་བྱུང་བ་ནི། བཤད་གྲྭ་དང་། སྒྲུབ་སྡེ་ཁག་གསུམ་བཅས་བཤད་སྒྲུབ་ཀྱི་སྡེ་དར་རྒྱས་ཆེ།
འཇོ་ཕུ་པད་དཀར་བཤད་གླིང་ནི། གཞུང་ཆེན་མོའི་འཆད་རྩོད་གཙོ་བོར་གྱུར་པའི་མདོ་སྔགས་རིག་གནས་དང་བཅས་པའི་འཆད་ཁྲིད་དང་། དམ་ཆོས་འདུལ་བའི་ཕྱག་ལེན་སོགས་སྔར་ལུགས་བཞིན་སྐྱོང་ཞིང་། ཕྱོགས་ཀྱི་གྲྭ་རྒྱུན་རྣམས་ལ་སློབ་གཉེར་གྱི་ཁོར་ཡུག་ཤིན་ཏུ་བཟང་བས་ཆོས་བརྒྱུད་གཞན་གྱི་སློབ་གཉེར་བ་སོགས་མང་དུ་འདུས་པའི་གྲྭ་སར་གྱུར་ཡོད།
འཇོ་ཕུ་སྒྲུབ་སྡེ་ཟབ་གསང་ཆོས་གླིང་། འདིར་སྔོན་འགྲོ་བསགས་སྦྱོང་གི་རིམ་པ་ནས་འཁོར་ལོ་སྡོམ་པ་སོགས་ཡི་དམ་ཁག་ཅིག་གི་བསྙེན་སྒྲུབ་དང་འབྲེལ་ན་རོའི་ཆོས་དྲུག་ཉམས་གཞེས་གནང་བའི་སྒྲུབ་གྲྭ་ཞིག་ཡིན་ལ། སྒྲུབ་ཡུན་ལོ་བཞིའི་རིང་སྒྲུབ་ཚུགས་ཤིན་ཏུ་དམ་པའི་སྒྲུབ་སྡེ་ཞིག་ཏུ་བཞུགས།
འཇོ་ཕུ་སྒྲུབ་སྡེ་དོན་བརྒྱུད་ཆོས་གླིང་། འདིར་བཞུགས་མཁན་ཕལ་ཆེ་བ་སྔར་སྒྲུབ་གྲྭར་བཞུགས་མྱོང་བ་དང་། གནས་དབེན་པ་སོང་ཕྱིར་ཚེས་བཅུ་ཉེར་ལྔ་བཅས་ལ་སྒྲུབ་ཁང་གི་ཕྱི་ལོགས་ཀྱི་ཉེ་འཁོར་དུ་འགྲོ་ཆོག འདིར་གཙོ་བོ་ཕྱག་ཆེན་སྒོམ་སའི་བསྟི་གནས་ཡིན།
ཕག་གྲུའི་སྒྲུབ་ཁང་ནི། འཇོ་ཕག་གྲུའི་ཕུག་གི་ཉེ་འོག་གི་སྒྲུབ་ཁང་སྟེ། འདི་ནི་མང་ཐོས་སྡེ་སྣོད་འཛིན་པ་རྣམས་དབེན་པ་བསྟེན་པའི་ནགས་གནས་ཀྱི་སྒྲུབ་སྡེ་ཞིག་ཡིན།
