༄༅། །མི་ཉག་འབོ་གངས་དཀར་དགོན་པའི་ལོ་རྒྱུས།
༡༽འབོ་གངས་དཀར་དགོན་པའི་མཚན་གྱི་འབྱུང་ཁུངས།
འབོ་གངས་དཀར་དགོན་པ་ནི་གནས་ཆེན་གངས་དཀར་རི་བོའི་མདུན་དུ་ཕྱག་བཏབས་པ་ཡིན་པས་ན་དགོན་པའི་མཚན་ལའང་འབོ་གངས་དཀར་དགོན་ཞེས་མཚན་ཐོབ། གངས་དཀར་རི་བོ་ནི་བོད་ཀྱི་ཡུལ་དུ་སྙན་གྲགས་ལྡན་པའི་གངས་རི་ཆེན་པོ་བཞི་ཡོད་པའི་ནང་གི་གནས་ཆེན་ཞིག་ཡིན་པ་མ་ཟད། སློབ་དཔོན་པདྨ་འབྱུང་གནས་དང་། མཁའ་འགྲོ་ཡེ་ཤེས་མཚོ་རྒྱལ་སོགས་ཀྱིས་ལུང་གིས་ཡང་ཡང་ཟིན་པ་དང་། སྒྲུབ་ཕུག་དང་གནས་ཁྱད་འཕགས་ཤིན་ཏུ་མང་། རྗེ་བཙུན་སྒྲོལ་མའི་གནས་ཀྱི་ཉེ་སྐོར་སྲ་མཁྲེགས་བྲག་ལས་གྲུབ་པ་དང་ཕག་མོའི་གནས་སོགས་སུ་བྲག་གི་ངོར་དེ་དག་གི་སྐུ་དང་སངས་རྒྱས་སྟོང་སྐུ་སོགས་སྐུ་དུ་མ་དང་ཕྱག་མཚན་རྣམས་ལྷམ་མེར་བཀྲ་ཡོད་པ་དང་། རྡོ་རྗེ་ཕག་མོའི་སྐུ་དང་སྔགས་ཕྲེང་ཕྱག་མཚན་རྣམས་འབུར་དུ་དོད་པ། རྒྱ་གར་གྲུབ་ཆེན་བརྒྱད་ཅུ། རྗེ་འབངས་ཉེར་ལྔ། ལྷ་ལུང་དཔལ་རྡོར། ཀརྨ་པ་སྐུ་རབས་མང་པོ་སོགས་ཀྱི་ཞབས་ཕྱག་གི་རྗེས་ལ་སོགས་པ་གྲུབ་རྟགས་ཀྱིས་ཡོངས་སུ་གང་བ། གཞན་ཡང་རྣལ་འབྱོར་གྱི་དབང་ཕྱུག་ཞིག་པོ་གཉིས་མེད་རྡོ་རྗེ། གྲུབ་པའི་དབང་ཕྱུག་ཀུན་དགའ་རྒྱལ་མཚན། གྲུབ་ཐོབ་ཐང་སྟོང་རྒྱལ་པོ་སོགས་གྲུབ་ཆེན་མང་པོས་ཞབས་ཀྱིས་བཅགས་ཤིང་། རྫུ་འཕྲུལ་གྱི་བཀོད་པ་དུ་མས་བྱིན་གྱིས་རླབས་པའི་གནས་ཆེན་ཞིག་ཡིན་ནོ།།
༢༽ འབོ་གངས་དཀར་དགོན་རྙིང་།
གནས་ཆེན་དེར་རབ་སྟོང་ཚར་སྒང་གི་གྲུབ་ཐོབ་རྣམ་གསུམ་གྱི་ཡ་གྱལ་དཔལ་ཨ་ར་ཆོས་རྗེ་ཉི་མ་རྒྱལ་མཚན་གྱིས་དུས་རབས་བཅུ་གསུམ་པའི་དཀྱིལ་བོད་རབ་བྱུང་བཞི་པའི་སྨད་ཙམ་ལ་སྒྲུབ་ཁང་ཆུང་ངུ་ཞིག་བཏབ། རྗེས་སུ་ཨ་ར་ཆོས་རྗེའི་དབོན་བླ་མ་གྲགས་པའི་དཔལ་གྱིས་རང་གི་བླ་མའི་སྒྲུབ་ཁང་དེ་རྒྱ་ཆེ་རུ་བསྐྱེད་ནས་རི་ཁྲོད་ལྟ་བུ་ཞིག་བཞེངས་པས། མཚམས་བསྙེན་སྒྲུབ་མཛད་མཁན་དང་ཕྱག་དང་སྐོར་བ་བྱེད་མཁན་མང་དུ་འཕེལ་བས། རི་ཁྲོད་དེར་གངས་དཀར་དགོན་ཞེས་དང་། བླ་མ་གྲགས་པའི་དཔལ་ལའང་གངས་དཀར་བླ་མ་ཞེས་པའི་མཚན་ཐོབ། རབ་བྱུང་ལྔ་པའི་ཤིང་བྱ་ལོ་སྟེ་སྤྱི་ལོ་༡༢༨༥ ལོར་གངས་དཀར་སྒྲུབ་སྡེ་འདི་བཏབས་པའོ།།
༣༽ ཁམས་གསུམ་གྲགས་དགོན་པ།
གངས་དཀར་ཡང་དགོན་ནམ་རྨ་སེ་དགོན་ཁམས་གསུམ་གྲགས་བདེ་ཆེན་གླིང་ནི་གངས་དཀར་སྐུ་རབས་གཉིས་པ་རྨ་སེ་རིན་ཆེན་བཟང་པོས་རབ་བྱུང་དྲུག་པའི་ཆུ་བྱི་ལོ་སྟེ་སྤྱི་ལོ་༡༣༧༢ལོ་ལ་གཟིམ་ལམ་དང་གང་ཅིར་རྟེན་འབྲེལ་བཟང་པོ་གཟིགས་ནས། ཤར་མི་ཉག་རིང་མོའི་དབུས། འབོ་གངས་དཀར་རི་བོ་དང་རྟ་པ་ཉིན་ལམ་གཅིག་གིས་ཆོད་པའི་སར། རྒྱབ་རི་གར་མིའི་སྐེད་པར་དཔལ་འཁོར་ལོ་བདེ་མཆོག་གི་གནས་སུ་དགོན་བཏབས་པ་དེར་ཐོག་མར་དགོན་གྱི་མིང་ཡང་དགོན་ཞེས་དང་རྗེས་ནས་རྨ་སེ་དགོན་ཁམས་གསུམ་གྲགས་བདེ་ཆེན་གླིང་ཞེས་རླུང་ལྟར་གྲགས་སོ།།རྗེས་སུ་དགོན་དེར་རྗེ་རྨ་སེ་རིན་ཆེན་བཟང་པོ་རྒྱུན་བཞུགས་མཛད་ཅིང་། བཤད་གྲྭ་དང་སྒྲུབ་གྲྭ་བཙུགས། བསྟན་པ་ཤིན་ཏུ་རྒྱས། རྒྱུན་བཞུགས་ཀྱི་སློབ་ཚོགས་ཀྱང་དྲུག་བརྒྱ་ལྷག་ཙམ་དུ་འཕེལ། གངས་དཀར་དགོན་རྙིང་དང་རྨ་སེ་དགོན་གཉིས་ཀྱི་བདག་པོ་རྗེ་རྨ་སེ་རིན་ཆེན་བཟང་པོས་མཛད་དོ། །
༡༽འབོ་གངས་དཀར་དགོན་པའི་མཚན་གྱི་འབྱུང་ཁུངས།
༢༽ འབོ་གངས་དཀར་དགོན་རྙིང་།
༣༽ ཁམས་གསུམ་གྲགས་དགོན་པ།
༤༽འབོ་གངས་དཀར་དགོན་གྱི་འཕོ་འགྱུར།
༥༽ རྨ་སེ་དགོན་ཁམས་གསུམ་གྲགས་བསྐྱར་གསོ་སྐོར།
༦༽རིག་གནས་གསར་བརྗེད་རྗེས་ཀྱི་གངས་དཀར་དགོན།
༧༽ རྨ་སེ་དགོན་གནས་སྤོ་རྗེས་ཀྱི་དགོན་པའི་འཕེལ་རྒྱས།
༨༽དེ་སང་འབོ་གངས་དཀར་དགོན་པའི་གནས་བབ།
ཐེག་མཆོག་བསྟན་འཛིན་ནས།