རྡོ་གཡུ་ཐོག་རྣམ་རྒྱལ་གླིང་དགོན་ཆེན།

གཡུ་ཐོག་དགོན་པ།
༡ མིང་ཚིག མདོ་སྨད་བཀའ་བརྒྱུད་ཀྱི་ཆོས་སྡེ་ཆེན་པོ་རྡོ་གཡུ་ཐོག་རྣམ་རྒྱལ་དགོན་པ་ནི། དཔལ་ཤུལ་རྡོ་སྟོད་དུ་འབོད་པའི་ས་ཆ་ད་ལྟའི་སི་ཁྲོན་རྔ་བ་ཁུལ། ཛཾ་ཐང་རྫོང་ནས་ནུབ་བྱང་མཚམས་སུ་ལེ་བར་ ༥༣ དང་། མཚོ་འཕགས་ ༣༤༠༠ ལྷག་ཡོད་པའི་གནས་དེར་ཆགས་ཤིང་གནས་འདི་དཔལ་འཁོར་ལོ་སྡོམ་པའི་ཐུགས་ཀྱི་གནས་ཡིན་པར་གསུངས། དགོན་འདི་ཕྱག་འདེབས་མཛད་པ་པོ་ནི་ཀྭན་ཏིང་ཏཱའི་སི་ཏུ་བསྟན་པའི་ཉིན་བྱེད་མཆོག་ཡིན་ལ། དེའི་ཚུལ་ནི་ཉིད་ཀྱི་བཀའ་ཤོག་ཕུག་མ་སྦུག་ཐམ་སྦྲགས་མ་ཕྱག་བྲིས་ཕྱག་བསྟར་མ་ལས། ངེད་རང་རྔ་ཆེན་ཆུ་ཁྱི་ལོར་༼ཕྱི་ལོ་ ༡༧༤༢༽ རྒྱལ་རོང་དུ་བསྐྱོད་སྐབས། རྡོ་སྟོད་ནས་དད་འབྱོར་བསོད་ནམས་ཀྱིས་མངོན་པར་མཐོ་བ་དཔོན་བསོད་ནམས་མགོན་པོ་ནས་སྒོ་གསུམ་གུས་པ་ཆེན་པོས་འདི་ཕྱིའི་སྐྱབས་ཡུལ་ཞུས་ཤིང་ཞེས་སོགས་དགོན་པ་འདེབས་པའི་ཞལ་གྲོས་བྱུང་ཚུལ་གསལ་བ་ལྟར་དང་། དེའི་ཕྱིར་ལོ་ཆུ་ཕག་ལོའི་ནག་ཟླའི་ཚེས་ལྔའི་ཉིན་དགོན་ས་དེར་བསང་དང་ས་ཆོག་བུམ་གཏེར་སྦས་པ་སོགས་གནང་སྟེ། སི་ཏུའི་རང་རྣམ་དྲི་བྲལ་ཤེལ་གྱི་མེ་ལོང་ལས། ནག་ཟླའི་ཚེས་ལྔར་གཡུ་ཐོག་ཏུ་དགོན་པ་འདེབས་པའི་སར་བུམ་གཏེར་སྦས། བསང་དང་ས་ཆོག་བྱས་བཏེགས། ཞེས་གསལ་བ་ལྟར་ད་ལྟའི་བར་དུ་ལོ་ ༣༠༠ ལ་ཉེ་བའི་རིང་ལ་ཁྲི་འཛིན་ཆོས་རྗེ་བླ་མ་ཁྲི་རབས་སོ་གཅིག་དང་༼དེའི་ནང་ནས་ཁྲི་འཛིན་བཅོ་བརྒྱད་གདན་ས་དཔལ་སྤུངས་ནས་ཕེབས་པ་ཡིན་༽བཤད་པའི་གཙོ་འཛིན་མཁན་རབས་བཅུ། སྒྲུབ་པ་ཉམས་ལེན་གྱི་གཙོ་སྐྱོང་སྒྲུབ་དཔོན་བླ་མ་ཁྲི་རབས་བཅུ་དང་གཞན་བླ་སྤྲུལ་ཉམས་རྟོགས་མཆོག་མངའ་མང་པོ་བྱོན། ད་ལྟ་དུས་རབས་ཉེར་གཅིག་པའི་ནང་འདིར་དགོན་འདིའི་བཤད་གྲྭ་དང་སྒྲུབ་གྲྭ་གོང་འོག་ཏུ་བླ་གྲྭ་མང་པོ་བཞུགས་ཏེ་འཆད་ཉན་དང་སྒོམ་སྒྲུབ་གནང་བཞིན་ཡོད། ཆོས་གྲྭ་འདི་དགོན་གཞུང་དང་མགོན་ཁང་དྲུག བཤད་གྲྭ་དང་ཡིག་གྲྭ། སྒྲུབ་སྡེ་གོང་འོག་གཉིས། འཚོ་བྱེད་གླིང་དང་དགེ་བསྙེན་གྱི་སྡེ་བཅས་ཁམས་ཚན་ཆེན་པོ་བརྒྱད་ཀྱིས་གྲུབ་ཡོད། ད་ལྟ་དཔལ་ཤུལ་དཔོན་ཁག་དང་ཨ་སྐྱོང་དཔོན་ཁག་སྟེ་ལྷ་སྡེ་ཤོག་ཆེན་གཉིས་ཀྱི་མཆོད་གཞིས་ཡིན་ལ་གཞུང་གྲྭ་ཁོ་ནའང་བཞི་བརྒྱ་ལྷག་བཞུགས་ཤིང་ཀར་ལུགས་རྒྱུད་སྡེ་བཞི་དང་ཟབ་ལམ་ནཱ་རོ་ཆོས་དྲུག་ཡན་ལག་ཐུན་མིན་ཐུན་མོང་བློ་སྦྱོང་དང་བཅས་པར་ཉམས་ལེན་གནད་སྨིན་དང་། ཀར་ལུགས་ཡིག་ཆ་ཁག་གི་གཙོས་མདོ་སྔགས་རིག་གཞུང་དང་བཅས་པར་འཆད་རྩོད་རྩོམ་གསུམ་རྒྱུན་མི་ཆད་པར་གནང་བ་ནས་དབྱར་གནས་སོགས་དུས་མཆོད་ཁག་ལྔ་ཡོད་པ་ཚང་མ་བརྒྱུད་པའི་ཕྱག་བཞེས་མ་ཉམས་ཁུངས་ལྡན་སྒྲུབ་བཞིན་བཞུགས། ༼རྒྱས་པར་ཤེས་འདོད་ན་རྡོ་གཡུ་ཐོག་དགོན་པའི་གདན་རབས་ལ་གཟིགས་འཚལ།༽

དངུལ་ཆུ་དང་ལྷ་སྲས་ནས།

དྭགས་ལྷ་སྒམ་པོ།

དྭགས་ལྷ་སྒམ་པོ།

མཚན་རྒྱས་པར་གདན་ས་ཆེན་པོ་དྭགས་ལྷ་སྒམ་པོ་ཞེས་ཞུ། དྭགས་པོ་ཞེས་པ་ནི་སྔོན་བོད་མིའི་རིགས་རུས་ཤིག་ཡིན་པ་དང་། དྭགས་ལྷ་སྒམ་པོ་ནི་སྲིད་པ་ཆགས་པའི་ལྷ་དགུའི་གྲས་ཡིན་པས་ལྷ་མིང་ཡུལ་ལ་ཆགས་པར་གྲགས། རྒྱ་ཚྭ་རྫོང་ནས་དཔྱང་ཟམ་ཕར་ཐོན་ཏེ་ཡར་ཀླུངས་གཙང་པོའི་བྱང་ངོས་ཀྱི་འཁོར་ལམ་སྤྱིར་བཏང་བ་བརྒྱུད་ཆོས་འཁོར་རྒྱལ་དུ་འགྲོ་སའི་ལམ་དང་། རྭ་སྒྲེང་འཁྲུངས་ཁང་སོགས་བརྒྱུད་སྤྱི་ལེ་བཞི་བཅུ་ལྷག་ཙམ་སོང་ན་གཅེས་ཞེས་པའི་གྲོང་དེར་འབྱོར། དེ་ནས་འཁོར་ལམ་མེད་ལ་རྐང་ཐང་མར་ཆུ་ཚོད་གསུམ་མ་ཟིན་ཙམ་འཛེགས་ན་དགོན་དེར་སླེབས། དགོན་དེ་ནི་མར་མི་དྭགས་གསུམ་གྱི་ཡ་གྱལ་མཉམ་མེད་དྭགས་པོ་ལྷ་རྗེས་སྤྱི་ལོ་༡༡༢༡ལ་ཕྱག་འདེབས་གནང་མཛད། གནས་དེ་ནི་རྒྱལ་བའི་ལུང་གིས་ཟིན་པའི་རི་བོ་ཤཀྟིར་རམ་རི་བྲག་ཚང་ཚིང་ཅན་གྱི་གནས་ལ་ངོས་བཟུང་། ངོ་མཚར་ཆེ་བའི་རྒྱབ་རི་ནས་སྐྱེས་བུ་དམ་པ་སོ་སོར་གཟིགས་སྣང་མི་འདྲ་བ་མང་པོ་བྱུང་བར་གྲགས། མཉམ་མེད་དྭགས་པོ་ལྷ་རྗེའམ་ཟླ་འོད་གཞོན་ནུ་ནི་སྤྱི་ལོ་༡༠༧༩ལོར་གཉལ་བོད་རྙིང་གྲོང་གསར་ཞེས་པར་སྐུ་འཁྲུངས་ཚུལ་དང་། བཙུན་མོ་སྲས་སྲོས་དང་བཅས་པ་རིམ་བཞིན་གཤེགས་ཚུལ་འཁོར་བ་ལ་ངེས་པ་འབྱུང་ནས་རབ་ཏུ་བྱུང་ཚུལ་སོགས་དེབ་འདིའི་ལྷུན་རྩེ་རྫོང་ཁོངས་མཁར་སྟེང་དགོན་གྱི་གནས་བཤད་ཀྱི་ཞར་དུ་ཞིབ་པར་གསལ། དྭགས་པོ་ལྷ་རྗེ་དགུང་ལོ་སོ་གཉིས་ལ་སྟོད་དུ་ཕེབས་ནས་རྗེ་བཙུན་མི་ལའི་ཞབས་ལ་གཏུགས། གདམས་ངག་གསན་ཏེ་ཉམས་མྱོང་གི་རྩལ་ཐོན། དབུས་སུ་ཕེབས་ཁར་རྗེ་བཙུན་མི་ལས་བུ་སྟོན་པ་དབུས་སུ་བཞུད་པ་ན།། ཤར་སྒམ་པོ་དར་གྱི་རི་བོ་དེ།། རྒྱལ་པོ་གདན་ལ་བཞུགས་པ་འདྲ།། རྒྱབ་རི་དར་དཀར་ཡོལ་བ་འདྲ།། རི་བདུན་བློན་པོ་འདུད་པ་འདྲ།། ཤིང་སྤང་གསེར་གྱི་མཎྜལ་འདྲ།། རི་དེ་ཡི་མགུལ་ན་གདུལ་བྱ་ཡོད།། ཁྱོད་དེ་རུ་སོང་ལ་འགྲོ་དོན་སྒྲུབས།། བུ་ཁྱོད་ཀྱི་བཞེད་དོན་འགྲུབ་ནས་མཆིས།། ཞེས་གསུངས་པ་ལྟར་དྭགས་ལྷ་སྒམ་པོ་ཕྱག་བཏབ། བཀའ་གདམས་པའི་ལམ་རིམ་དང་། རྗེ་མི་ལའི་བཀའ་ཕྱག་རྒྱ་ཆེན་པོའི་གདམས་པ་གཅིག་ཏུ་དྲིལ་ནས་ལམ་རིམ་ཐར་རྒྱན་མཛད། ལོ་གསུམ་སྟན་དང་མ་བྲལ་བར་སྒོམ་པའི་བརྩོན་འགྲུས་བསྐྱེད་པས་བཟོད་སེམས་ཀྱི་ངོ་བོ་མཐོང་། ཆོས་ཐམས་ཅད་ཀྱི་དེ་ཁོ་ན་ཉིད་མཁྱེན། སློབ་མ་མཐའ་ཡས་པ་བྱུང་ནས་དྭགས་པོ་བཀའ་བརྒྱུད་པའི་སྲོལ་གཏོད། སྔོན་དགོན་དེར་གཙུག་ལག་ཁང་ཀ་ཆེན་བཞི་བཅུ་དང་། ཀ་ཡུལ་ལྔ་བཅུ་རྩ་བཞི། ཟངས་ལུང་སྤྲུལ་པའི་ཕོ་བྲང་། གསང་སྔགས་ཕོ་བྲང་། ཆོས་ཁང་རྩེ་སོགས་སོ་སོར་དྭགས་པོ་ལྷ་རྗེའི་ཐུགས་དག་གྱི་རྟེན་རྗེ་མི་ལའི་སྐུ་དང་། དྭགས་པོ་ལྷ་རྗེའི་སྐུ་གསུང་འབྱོན་མ། ཇོ་བོ་རྗེའི་ཕྱག་བཟོ་ཐུགས་རྗེ་ཆེན་པོ་གཙོ་འཁོར། མངའ་བདག་ཁྲི་རལ་གྱིས་བཞེངས་པའི་སྤྱན་རས་གཟིགས་ཁ་སར་པ་ཎི། ཀླུ་སྒྲུབ་ཀྱི་ཕྱག་བྲིས་གྲུབ་ཆེན་མང་པོའི་ཕྱག་བརྒྱུད་པ་ན་རོ་པའི་ཐུགས་དམ་གི་རྟེན་བདེ་མཆོག་གི་སྐུ་ཐང་། མར་པའི་ཕྱག་བྲིས་ན་རོ་པའི་སྐུ་ཐང་། བེེཌཱུརྻའི་གླེགས་བམ་ཉི་ཁྲི་སོགས་ནང་རྟེན་ཁྱད་དུ་འཕགས་པ་མང་པོ་བཞུགས།

ད་ལྟ་གསར་བཞེངས་གནང་བའི་འདུ་ཁང་ནང་གསེར་ཟངས་ཀྱི་དྭགས་པོ་ལྷ་རྗེའི་སྐུ་བརྙན་ཐོག་ཚད་མའི་ཐུགས་ཀར་གུ་རུའི་རིང་བསྲེལ་དང་། རྗེ་ཉིད་ཀྱི་དབུ་ཀླད་རིང་བསྲེལ། ཐུགས་ལྗགས་འཁྲུལ་བྲལ། སངས་རྒྱས་བྱང་སེམས་མང་པོའི་རིང་བསྲེལ་བཞུགས་པ་བྱིན་ཅན། གཞན་ཡང་གསར་བཞེངས་གནང་བའི་སྐུ་བརྙན་མང་པོ་མཇལ་རྒྱུ་ཡོད།

ཡེ་ཤེས་བྱང་ཆུབ་ནས།

རྡོ་རྗེ་ཕ་ལམ་ནས།

དུས་ཀྱི་བྱ་སྐད་ནས།

སྟེང་འགྲོ་དགོན།

གནས་འདི་རྒྱལ་བ་རྒོད་ཚང་པའི་སྟེང་འགྲོ་དགོན་པ་རེད། དེང་དུས་གཞི་རྩེ་དིང་རི་རྫོང་ཁོངས་སུ་ཡོད།

ཀརྨ་སྙིང་གཟུགས་ནས།